DILI, 16 agostu 2022 (TATOLI)—Diretora Asisténsia Legál ba Feto no Labarik (ALFaLa), Marcelina Amaral, hateten iha tinan 2020 to’o 2021 ALFELA rejista kazu foun iha totál 1,185 ne’e kazu violénsia doméstika mak aas liu.
Notísia Relevante: Hamenus violénsia doméstika, PR konsidera feto tenke iha poder ekonómiku
“Hosi kazu ho totál 1,185 ne’e, iha tinan 2021 ALFeLa rejistu kazu foun hamutuk 680, ne’e kazu foun de’it la inklui kazu tuan sira-ne’ebe sei prosesu hela iha nivel Polísia Nasionál Timor-Leste (PNTL), Ministériu Públiku no Tribunál Rekursu, nune’e mós iha 2020 ami rejista no atende kazu 505,” Marcelina Amaral hateten ba Agência Tatoli, iha Caicoli, segunda ne’e.
Baibain kada fulan ALFeLa rejistu kazu 25 to’o kazu 30 no hosi kazu ne’e violénsia doméstika mak aas liu, hafoin tuir mak kazu violasaun seksuál, abuzu seksuál ba menór sira inklui kazu insestu sira.
Aleinde ne’e kazu violénsia doméstika, nia hateten, ALFeLa rejistu kazu infantisídiu tolu (3), no ALFeLa bele fó defeza bainhira natureza kazu ne’e iha limitiza defeza ba iha kazu krime sira, no sira mós bele fó defeza ba iha kazu poder paternál no alimentár menór ba inan sira-ne’ebé mai hato’o keixa kona-ba hetan abandonu menór bainhira sira reprezenta sira-nia oan mai hato’o keixa.
“Entaun, entre kazu sira-ne’ebé ohin ha’u dehan ne’e 10% no hosi kazu sira-ne’e kazu sivil ezersísiu poder paternál no alimentar,” nia dehan.
Sekretáriu Estadu Igualdade no Inkluzaun (SEII), Maria do Rosária de Fatima Correia, hateten ema hotu iha direitu no obrigasaun oinsá atu luta kontra violénsia oioin ne’ebé mak hasoru feto no labarik feto.
“Ne’e papel SEII nian maibé ida-ne’e la’ós papel SEII nian de’it, papel ita hotu nian atu oinsá halakon violénsia kontra feto, labarik feto ema ho defisiénsia no komunidade LGTBI sira no mós grupu vulnerável sira seluk ne’ebé presiza ita atu tulun,” nia dehan.
Notísia Relevante: Aileu rejistu kazu violénsia doméstika aas liu
Jornalista : Osória Marques
Editór : Cancio Ximenes
