iklan

DILI

Aileu rejistu kazu violénsia doméstika aas liu

Aileu rejistu kazu violénsia doméstika aas liu

Sekretária Estadu ba Igualdade no Inkluzaun (SEII), Maria do Rosário Fátima Correia. Imajen Tatoli/Francisco Sony.

DILI, 28 juñu 2022 (TATOLI)—Sekretária Estadu Igualdade Inkluzaun (SEII), Maria dos Rosário Fátima Correia, informa hosi fulan-janeiru to’o juñu ne’e munisípiu Aileu rejistu kazu 20 maibé kazu violénsia domestika mak aas liu.

“Hanesan iha Aileu, sira hateten katak hosi fulan-janeiru to’o juñu ne’e rejistu kazu hamutuk 20 maibé kazu dominante mak kazu violénsia doméstika,” Governante ne’e hateten ba jornalista sira, hafoin halo reuniaun ho komité diretiva Spot Light tinan ne’e, iha Novo Turismo, Licidere, Dili, tersa ne’e.

Kazu ida-ne’e, nia dehan, bainhira halo vizita ba Unidade Ema Vulnerável (VPU) iha munisípiu Aileu, kazu hirak-ne’e sei iha prosesu nia-laran.

“Se de’it mak hatene kazu ne’e tenke halo denúnsia ba iha VPU ka Ministériu Públiku,” nia dehan.

Durante ne’e, nia parte hala’o vizita ba iha munisipiu sira no husu VPU sira katak kazu ne’ebé mak rejistu iha tinan ida-ne’e kompara ho tinan uluk sei nafatin katak kazu violénsia doméstika mak sei domina nafatin.

Tuir nia, Parlamentu Nasionál (PN) aprova ona lei violénsia doméstika ho númeru 7/2010, iha loron tersa (03 maiu 2010), ho objetivu atu implementa medida ne’ebé efetivu atu prevene no promove direitu vítima sira-nian no apoiu vítima hosi violénsia doméstika, hala’o tuir estandar internasionál direitu umanu nian.

Lei ne’e atu kria no haforsa mekanizmu ba prevensaun violénsia doméstika no promove direitu vítima no mós fó protesaun legál ba vítima sira.

Obrigasaun hosi Lei refere fó ba Estadu atu prevene violénsia doméstika, inklui violénsia fíziku, seksuál, psikolójiku no ekonómia.

Estadu mós hetan obrigasaun atu proteje no fó asisténsia ba vítima sira, ho intensaun atu proteje membru família hosi violénsia doméstika inklui violénsia hasoru espoza, eis espoza, oan sira, parente no ema seluk ne’ebé servisu iha uma laran (Empregada).

Entaun, nia dehan, liuhosi implementasaun Spotlight ne’ebé hetan suporta hosi Uniaun Europeia fó apoia orsamentu ba iha programa Spotlight hodi hala’o serbisu atu elamina violénsia kontra feto no labarik feto nomós komunidade LGBTI iha nasaun.

“Ita iha lei violénsia doméstika no kazu dominante Kazu Violensia domestika. Tuir kedas violénsia seksuál no abuzu seksuál no kazu insestu. Kazu insestu katak entre raan ho raan katak aman halo ba oan feto no tiun halo ba subriña, maun halo ba feton ka patrastu halo ba oan feto, no ida-ne’e mak durante ne’e akontese,” nia dehan.

Koordenadór Rezidente ONU iha Timor-Leste, Roy Trivedy dehan, oras ne’e kazu violénsia doméstika kontinua buras tanba ne’e tenke hamutuk elimina violénsia kontra feto no labarik feto iha sosiedade.

“Tenke elimina violénsia kontra feto no labarik feto, ema ho defisiénsia, ema hotu iha família no sosiedade liuhosi programa Spotlight,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!