COVALIMA, 24 novembru 2023 (TATOLI) – Servisu Rejistu Notariadu Covalima, entre loron 22 no 23, halo ona atendimentu ba sidadaun 108 ne’ebé trata pasaporte komun.
Diretór Servisu Rejistu Notariadu Covalima, António Sarmento, relata katak iha loron 22 halo atendimentu ba sidadaun 46 (feto 16 no mane 30) no iha loron tuirmai ba ema 62 (feto 31 no mane 31).
“Sidadaun ne’ebé trata pasaporte ho tipu komun ne’e maioria sira ne’ebé hetan oportunidade atu bá serbisu iha Koreia no Austrália, balun atu tuir treinamentu iha rai-li’ur no balun atu asesu ba bolsa estudu”, adianta.
Kritériu atu trata pasa porte komun tenke lori dokumentu sira hanesan ba sira ne’ebé atu renova lori passaporte tuan, ba ida ne’ebé nia pasaporte nakonu mós lori pasaporte tuan, no ba foun lori billeti identidade (BI) no sertidaun RDTL.
Kritéria trata pasaporte ba labarik menór ho idade 12 ne’ebé seidauk iha kartaun eleitorál tenke lori dokumentu hanesan, deklarasaun inan no aman, inan no aman nia sertidaun no aprezenta mós inan-aman nia sertidaun RDTL.
Oráriu atendimentu hahú segunda to’o kinta-feira no loron sesta labele halo atendimentu ba sidadaun sira tanba haree arkivu no halo limpeza jerál iha edifísiu notariadu Covalima.
Jornalista: Celestina Teles
Editora: Maria Auxiliadora
