DILI, 28 novembru 2023 (TATOLI) – Xefe Estadu Timor-Leste, José Ramos Horta hanesan mós Premiadu Novel da Paz hateten, nia parte hamutuk ho povu Timor-Leste kontinua fó solidariedade ba povu no Governu Unidade Nasionál, Myanmar.
“Ami kontinua solidáriu ho povu no Governu Unidade Nasionál (NUG) Repúblika Uniaun Myanmar nian, espesialmente ho drama ne’ebé komunidade Rohingya nian hasoru,” Horta hateten, iha ámbitu komemorasaun loron Proklamasaun 28 Novembru, iha Palásiu Prezidensiál, Bairru-Pité, Dili, ohin.
“Ami kontinua konsidera NUG, iha termus Direitu Internasionál, hanesan “Governu iha ezíliu” ne’ebé agrupa iha komité reprezentante sira husi Governu no Parlamentu Nasionál Myanmar nian ne’ebé eleitu lejitimamente iha eleisaun loron 08 fulan novembru tinan 2020, iha ne’ebé destaka lideransa Konselleira Estadu no Laureada Nobel Paz, Aung San Suu Kyi,” nia reforsa.
Estadu, “Governu iha ezíliu” ne’ebe reúne membru sira husi partidu opozisaun ne’ebé eleitu ho demokrasia ba Parlamentu, ne’ebé fó ba nia lejitimidade akresida no reprezentativu ba setór sira oioin iha sosiedade Myanmar nian.
“Nune’e ami kontinua kondena golpe militar ne’ebé akontese iha loron 01 fulan Fevereiru 2021, no ami apela ba Junta Militar atu hahú konsidera legalidade konstitusionál no respeita liberdade no direitu fundamentál, espesialmente tuir pontu lima ne’ebé ASEAN defini hanesan konsensu,” nia konklui.
Jornalista: Hortencio Sanchez
Editór: Rafael Ximenes de A. Belo
