DILI, 28 novembru 2023 (TATOLI)–Prezidente Konsellu Kombatente Libertasaun Nasionál (CCLN-sigla Portugés), Vidal de Jesus “Reak Leman”, hateten iha komemorasaun 28 novembru ba dala-48 ne’e Estadu kondekora kombatente iha munisípiu Manufahi hamutuk 174 ho orden Nicolau Lobato.
Estadu Timor-Leste liuhosi dekretu Prezidente Repúblika númeru 104/2023, tersa (28 novembru 2023) ne’e, atribui kondekorasaun medalla orden Nicolau Lobato no medalla orden funu na’in tinan 24 ho grau II no III ba kombatente sira, nu’udar rekoñesimentu ba kontribuisaun luta ba libertasaun nasionál.
“Ami iha ne’e kondekora kombatente 174 no feto mós lubuk ida iha ne’e no hosi nível nasionál hamutuk 1.899,” Reak Leman hateten ba Agência Tatoli, liuhosi telefónika, tersa ne’e.
Veteranu ne’e esplika, orden Timor-Leste ne’ebé kria ona ho prestíjiu no dignidade atu fó rekoñesimentu ba sira-ne’ebé iha nasionál no internasionál fó ona sira-nia kontribuisaun ne’ebé boot ba benefísiu Timor-Leste nian.
Ba kombatente libertasaun ne’ebé simu ona medalla ne’e sai ezemplar ida ba oan no jerasaun foun sira atu banati tuir.
“Ohin, iha ámbitu atribuisaun medalla ba veteranu no veteran. Ha’u hateten katak ita-boot sira mak sai eroi vivu ne’ebé fó aan ba rai ida-ne’e, nune’e husu ita-boot sira atu hamutuk ho joven sira liuliu ita-nia oan sira atu koopera ho Estadu, Governu no entidade hotu-hotu atu kontribui ba dezenvolvimentu nasionál,” nia hateten.
Tanba, nia hateten, bainhira dezenvolvimentu la’o ho di’ak mak povu hotu sente mak hosi ne’e sei redús susar no terus povu nian.
Jornalista : Osória Marques
Editór : Cancio Ximenes
