DILI, 28 novembru 2023 (TATOLI)—Profesór Ensinu Ekivalente munisípiu Dili, António Justino Guterres, hateten politika Ministériu Edukasaun tanke haforsa kurríkulu Timor-Leste nian liuliu unidade kuríkulu Sidadania no Dezenvolvimentu Sosiál hodi hametin estudante sira-nia nasionalizmu no patriotizmu.
Notísia Relevante: Edukasaun kona-ba nasionalizmu-patriotizmu iha eskola seidauk másimu
“Ida-ne’e bele eduka espíritu joven nian atu hadomi nia rain, no bele hatene símbolu nasionál sira hanesan bandeira, Ino Nasionál no emblema nasionál sira, hodi hametin estudante sira-nia nasionalizmu no patriotizmu. Ministériu Edukasaun tenke reforsa kurrikulu edukasaun nian hodi reforsa estudante sira atu aprende,” Profesór Ensinu Ekivalente munisípiu Dili, António Justino Guterres, hateten ba Agência Tatoli, relasiona Timor-Leste komemora loron proklamasaun indenpendénsia ba dala-48 (28/11/23-28/11/23) ho tema “Celebrar a História e Construir o Futuro”, siha Palásiu Prezidensiál Nicolau Lobato, Bairru Pite, tersa ne’e.
Husu kona-ba patriotizmu no nasionalizmu, nia hatán, konseitu rua (2) ne’ebé interligadu ka daet malu, iha ne’ebé konseitu nasionalizmu nu’udar dutrina ida-ne’ebé hanorin ema ida-idak atu hatuur nasaun aas liu inteerese grupu ka partidu sira-nian no hatudu esperitu lealdade hodi kontribui ba ba prosesu konstrusaun Estadu.
Enkuantu patriotizmu nu’udar sentimentu orgullu ne’ebé sidadaun ida-idak iha hodi hadomi rai Timor-Leste liu sásan hotu-hotu.
Ezemplu, nia dehan, ema-ne’ebé iha patriotizmu sempre komunga katak rai Timor bele kiik no ki’ak maibé Timor ne’e nia raan fakar fatin no hadomi Timor-Leste laiha rezerva.
“Ha’u-nia mensajen hakarak husu ba entidade hotu-hotu liuliu joven sira atu fó liman ba malu, kria pás no estabilidade iha ita-nia rain, nune’e aselera dezenvolvimentu hodi fó moris di’ak ba ita-nia povu,” nia dehan.
Notísia Relevante: Hadi’a estudante nia sentidu patriotizmu-nasionalizmu tenke investe iha setór edukasaun
Jornalista : Osória Marques
Editór : Cancio Ximenes
