DILI, 29 novembru 2023 (TATOLI) –Prezidente Repúblika (PR), José Ramos Horta, preokupa ho subsídiu saúde no transporte ba deputadu sira, ne’ebé aprovadu iha Parlamentu Nasionál (PN).
“Ha’u haree ne’e boot tebes, Estadu iha ona Orsamentu Jerál Estadu kada tinan ba saúde, ema ida kuandu moras kualker sidadaun atu Deputadu fali, atu membru Governu fali bele ba halo tratamentu iha rai-li’ur, maibé atu fó $600.00 kada fulan ba deputadu ida hodi halo tratamentu ba saúde be osan sira preve kada tinan iha Ministériu Saúde no Ministériu Solidaridade Sosiál ne’e oinsa?” Horta kestiona perante jornalista sira iha edifísiu Komisaun Nasionál Eleisaun (CNE-sigla portugés) Dili, ohin
“Depois osan ba transporte $1,600.00 kada deputadu ida fulan fulan, ida ne’e bele halo Deputadu sira naran fo’er liu tan depois injustisa boot,” nia reitera.
Notísia relevante: https://tatoli.tl/2023/11/24/subsidiu-akizasaun-viatura-atu-pn-labele-sosa-tan-karreta-ba-deputadu/
Tanba ne’e, nu’udar Xefe Estadu sei ko’alia ho Primeiru-ministru, Kay Rala Xanana Gusmão no Prezidente Parlamentu Nasionál, Fernanda Lay, atu haree ba asuntu ne’e.
“Ha’u sei ko’alia ho Primeiru-ministru, Prezidente Parlamentu Nasionál atu haree, labele hanesan ne’e, klase ida mak atu hetan benefisiu barak liu ne’e labele, osan iha aumenta ba labarik kiikoan sira, ba inan isin-rua sira, ba joven sira, estudante sira, deputadu sira iha ona vensimentu ne’ebé di’ak,” nia hatete.
Nia hatutan, bainhira lei ne’e haruka ba Prezidente Repúblika nia rasik iha poder atu veta tanba la fó benefisiu ba Estadu maibé ba de’it grupu balun.
“Ha’u sei veta, maibé ha’u sei ko’alia ho Maun Boot Xanana, tanba ha’u iha konsiénsia atu labele simu buat sira hanesan ne’e, kestaun saúde tenke haree ba ema hotu la’ós ba de’it klase ida. Ita haree enfermeiru sira iha foho, mestre sira iha foho ki’ak aat los ne’e, tanba saida la halo programa espesiál saúde ba sira, ba fali deputadu sira, ida ne’e ha’u la konkorda,” PR salienta.
“Se deputadu sira hirus ha’u, ko’a ha’u-nia osan ko’a ba! Ko’a ha’u-nia osan viajen ba estranjeiru ko’a ba ha’u la preokupa, maioria ha’u-nia viajen ema estranjeiru mak selu. Ha’u-nia viajen ne’e maioria lori ema simplis, lori mak jornalista sira, ha’u-nia viajen ne’e mós la’ós ho ema ne’ebé ekipa boot,” nia konklui.
Notísia relevante: https://tatoli.tl/2023/11/29/xefe-bankada-cnrt-konkorda-hasai-subsidiu-transporte-saude-ba-deputadu-sira/
Jornalista: Hortencio Sanchez
Editór: Rafael Ximenes de A. Belo
