iklan

EKONOMIA, MUNISÍPIU, VIQUEQUE

CCI-TL Viqueque hakarak organiza emprezáriu investe iha setór agrikultura

CCI-TL Viqueque hakarak organiza emprezáriu investe iha setór agrikultura

Prezidente CCI-TL munisípiu Viqueque, Florêncio Armindo da Conceção G da Costa, entrega materiál kulinária ba partisipante kompetisaun kulinária, sesta (01/12/2023). Imajen Tatoli/Vitorino Lopes da Costa

VIQUEQUE, 01 dezembru 2023 (TATOLI)Kámara Komérsiu Indústria Timor-Leste (CCI-TL) munisípiu Viqueque hakarak konvense no organiza emprezáriu Viqueque-oan hodi investe iha setór agrikultura.

“Ami iha ona hanoin atu emprezáriu Viqueque-oan sira organiza malu investe mós iha setór agrikultura tanba empreza sira ne’ebé eziste iha munisípiu Viqueque, maioria serbisu iha área konstrusaun sivíl,” Prezidente CCI-TL munisípiu Viqueque, Florêncio Armindo da Conceção G da Costa, hateten ba Agência Tatoli, hafoin partisipa iha marsa saudável, iha postu Viqueque Vila, sesta ne’e.

Nia konsidera, setór privadu la’ós de’it halo atividade iha área konstrusaun sivíl no negósiu sira, maibé presiza haree mós iha setór produtivu sira seluk.

“CCI-TL nasionál mós trasa ona programa atu foka ba investimentu ba produsaun rai-laran, setór privadu hola parte ba setór agrikultura hanesan hare, batar, fore-mungu no seluk tan, ne’ebé eziste iha munisípiu ida-idak hodi ita-nia maluk emprezáriu sira bele investe,” nia akresenta.

Notísia relevante : Armazen agrikultura Viqueque la utiliza ho di’ak tanba laiha koordenasaun

Florêncio Armindo dehan, bainhira emprezáriu sira foku liu ba konstrusaun sivíl ne’e sai dezafiu tanba difisil atu sa’e produsaun rai-laran.

“Se ita foku loos ba konstrusaun sivíl, ha’u sente sei difikulta ba ita tanba produsaun kontinua menus, ita maka lakohi tau importásia ba setór agrikultura iha ita-nia rai ida-ne’e,” nia tenik.

Nune’e, CCI-TL sei ko’alia ho emprezáriu sira atu investe mós iha setór agrikultura no CCI-TL mós prontu kolabora ho Ministériu Agrikultura, Pekuária, Peska no Floresta (MAPPF) hodi haree produsaun ai-han lokál.

“Ita-nia empreza sira-ne’ebé rejista ne’e hotu-hotu iha konstrusaun sivíl, laiha ida maka halai ba setór agrikultura. Nune’e, ami sei foti filafali dadus empreza sira atubele foku liu ba setór agrikultura. Ha’u husu emprezaria Viqueque-oan sira tau hamutuk hanoin atu ita bele halo investimentu boot iha setór agrikultura,” nia tenik.

Tuir dadus hosi CCI-TL Viqueque, empreza lokál sira ne’ebé rejistadu munisípiu Viqueque hamutuk 188, ne’ebé maioria halo atividade iha área konstrusaun sivíl.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!