iklan

NASIONÁL, HEADLINE, INKLUZAUN SOSIÁL

PM Xanana orienta MSSI promove ema ho defisiénsia ne’ebé iha talentu

PM Xanana orienta MSSI promove ema ho defisiénsia ne’ebé iha talentu

Primeiru-Ministru, Kay Rala Xanana Gusmão, partisipa iha komemorasaun loron mundiál ema ho defisiénsia, iha CCD, sesta (01/12/2023). Imajen Tatoli/António Daciparu

DILI, 01 dezembru 2023 (TATOLI)–Primeiru-Ministru (PM), Kay Rala Xanana Gusmão, orienta Ministériu Solidariedade Sosiál no Inkluzaun (MSSI) no ministériu relevante seluk atu tau importánsia no promove talentu ema ho defisiénsia sira.

Xanana nota katak ema ho defisiénsia barak mak iha talentu di’ak, tanba ne’e instituisaun balun hahú promove.

“Iha atividade Telkomcel nian, sira fó prémiu ba ema na’in-rua, hosi sira rua ne’e na’in-ida ema ho defisiénsia. Ne’e hatudu katak Governu liuhosi Ministériu Solidariedade Sosiál no ministériu sira seluk tenke buka oin nusa dezenvolve di’ak liután. Ezemplu ki’ik mak ema ho defisiénsia balun bele hakerek no talentu sira seluk,” PM Xanana hateten bainhira partisipa iha loron mundiál ema ho defisiénsia, iha Sentru Konvensaun Dili (CCD, sigla portugés), sesta ne’e.

Notísia relevante : ADTL-Governu diskute área temátiku lima ba Ema ho Defisiénsia sira

Xefe Governu dehan, ema ho defisiénsia daudaun ne’e iha rihun 27, tanba ne’e tenke kria kondisaun di’ak hodi sira bele asesu fasilidade públika tanba sira ne’e timor-oan.

“Sira labele la’o mós ne’e ema, atu la haree mós ne’e ema no atu la rona mós ne’e timor-oan. Ne’e duni solidariedade sosiál ne’e la’ós de’it atu ajuda maibé iha liafuan inkluzaun ne’e dehan oinsá bele aproveita talentu no hahalok di’ak, kbiit ruma atubele hetan inkluzaun iha sosiedade nia laran. Iha buat oin-oin kuandu ita temi edukasaun, temi talentu, ne’e katak ideia ida bele fó saida mak nia bele, balun sai pintór, hakerek surat. Ne’e duni ita la’ós kria ministériu ida atu fó osan no hahán ba sira han maibé buka dezenvolve kbiit ne’ebé iha, ida-ne’e maka importante,” nia tenik.

Xanana dehan, Governu sei book-an, ho sosiedade sivil no organizasaun internasionál sira nia ajuda hodi bele lori nafatin maluk defisiénsia sira ne’ebé iha kbiit maibé parte ida hosi sira-nia isin la permite sira atu kontribui hanesan ema normál.

“Iha ita-nia sosiedade la’ós katak ema ida bele halai, ko’alia, rona, ne’ebé ema sira ne’e hotu kontribui ho laran ba prosesu dezenvolvimentu, la’ós! Balun baruk-teen, balun la halo buat ida, ne’ebé agora ba oin ita atu haree took hosi imi (defisiénsia) iha ne’ebé maka Governu ho organizasaun sira seluk bele dudu hodi imi hatudu katak ami nu’udar timor-oan ami mós bele halo netik buat ruma tuir ami-nia kbiit,” Xanana tenik.

Tanba ne’e, Xefe Governu fiar metin katak bainhira ema hotu hamutuk bele dudu prosesu ne’e, nune’e ema ho defisiénsia mós bele sente iha kbiit no bele partisipa ativu liután iha dezenvolvimentu nasaun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!