DILI, 04 dezembru 2023 (TATOLI)–Primeiru-Ministru (PM), Kay Rala Xanana Gusmão, liuhosi despaixu númeru 014 /PM/XII/2023, ne’ebé formaliza iha loron 01 dezembru 2023, harii ona Komisaun ba transmisaun mandatu membru Rejiaun Administrativa Espesiál Oé-cusse Ambeno (RAEOA).
Inisiativa ne’e mai hosi alterasaun lejizlativa ne’ebé prevee ona iha lei númeru 18/2023 loron 30 novembru, ne’ebé automátikamente determina termu funsionáriu sira inklui Prezidente Autoridade, Arsénio Bano.
“Estabelesimentu komisaun ida-ne’e atu asegura tranzisaun ne’ebé di’ak hosi mandatu RAEOA liuhosi halo pontu situasaun administrativa no finanseira iha rejiaun ne’e molok hahú prosesu nomeasaun membru foun sira,” refere nota ne’ebé Agência Tatoli asesu, segunda ne’e.
Notísia relevante : Prezidente Repúblika promulga ona alterasaun lei RAEOA no ZEESM
Aleinde ne’e, komisaun sei simu hodi Primeiru-Ministru nia naran, relatóriu mandatu membru RAEOA, nune’e mós relatóriu ida iha loron 15 nia laran, ne’ebé sei halo pontu situasaun no avalia atividade administrativa no finanseira sira ne’ebé dezenvolve hosi Autoridade RAEOA, ne’ebé inklui rekursu umanu, inventáriu patrimóniu no patrimóniu sira, inklui identifikasaun obrigasaun kontratuál sira.
Komisaun ne’e sei koordena hosi Sebastião José Luis dos Santos Pereira, Dulce Guterres Junior, Agostinho Caet, Francisco da Costa Soares ‘Borlaku,’ Benedito Escorial Fernandes, Januário Maia Guterres no Ricardo Alves Delgado.
Membru Komisaun sira sei serbisu hamutuk ho órgaun no servisu sira iha RAEOA, ne’ebé sei fornese dokumentu no informasaun hotu ne’ebé presiza. Unidade Apoiu Jurídiku Prezidénsia Konsellu Ministru sei fó konsellu legál.
“Alterasaun sira ne’ebé promove iha lei númeru 18/2023 loron 30 novembru ba estatutu RAEOA nian, orienta hosi kritériu ekonomia no efisiénsia, ho objetivu atu fornese ba territóriu instrumentu legál sira ne’ebé importante atu promove dezenvolvimentu ekonómiku ba povu sira-nia moris,” esplika nota hosi Governu.
Antes ne’e, iha loron 21 novembru 2023, Prezidente Autoridade RAEOA, Arsénio Paixão, adjuntu/a no membru hamutuk na’in-10 deklara rezigna-an, ho razaun desde loron 01 jullu Governu seidauk fó resposta kona-ba kontinuasaun mandatu.
Nune’e, Prezidente Autoridade hato’o karta ba Governu sentrál hodi hein Governu nomea ema foun. Iha sorin seluk, Parlamentu Nasionál aprova ona revizaun lei númeru 3/2014 , loron 18 juñu, ne’ebé kria RAEOA no Estabelese Zona Espesiál Ekonomia Sosiál Merkadu (ZEESM) no ikus mai Prezidente Repúblika promulga ona.
Jornalista : Antónia Gusmão
Editora : Julia Chatarina
