DILI, 04 dezembru 2023 (TATOLI) – Ministériu Edukasaun (ME) transfere ona subsídiu transporte ba konta bankária manorin 14.112 no falta 127 mak seidauk hetan sira-nian direitu tanba naran ladeteta iha sistema Ministériu Finansa.
Diretora Nasionál Rekursu Umanu, Anita de Jesus, hatete ministériu daudaun esforsu hela hodi halo verifikasaun fali ba dokumentu manorin sira ne’e.
“Tanbá saida maka profesór 127 ne’e ninia dokumentu ne’ebé ita submete ona ne’e sistema la simu fali. Manorin sira-nian dokumentu haruka ba finansa ne’e kompleta hotu ona inklui númeru payroll”, Anita de Jesus afirma ba Tatoli iha Vila Verde, ohin.
Tuir dirijente, lista manorin sira-nian ne’ebé payroll Ministériu Finansa (MF) haruka fali ba Edukasaun ne’e dauduan iha hela prosesu verifikasaun no banhira hotu haruka lalais fali ba atu iha novembru ne’e bele hetan subsídiu refere.
Aleinde ne’e, iha mós dosente hamutuk 600-resin maka sira-nian dadus la inklui iha lista foin lalais submete ba MF tanba tanba sira-nian númeru iha payroll seidauk iha no agora rezolve ona no submete fali ona ba atubele hetan mós subsídiu iha fulan ne’e.
Koordenadór Eskola Báziku Filiál (EBF) Bebonuk, Felisberto de Jesus, informa osan subsídiu transporte kada fulan $25 ne’e tama ona ba konta bankária manorin ida-idak nian.
“Ami profesór hamutuk na’in-24 iha EBF Bebonuk ne’e kuaze hetan hotu ona subsídiu transporte kada fulan $25 vezes ba fulan neen ne’e hamutuk $150”, responsavel ne’e haktuir ba Tatoli, ohin.
Ministériu Edukasaun prevee millaun $2,1 ba subsídiu transporte ba profesór 14.239 iha territóriu no manorin ida hetan $25 kada fulan hahú husi juñu to’o novembru.
Pagamentu subsídiu transporte ba profesor sira ne’e tenke finaliza iha dezembru, nune’e bainhira kontinua fali iha tinan oin valór ne’e deferente ona.
Notísia relevante: Edukasaun aloka millaun $2,1 ba subsídiu transporte no pagamentu realiza iha novembru
Jornalista: Tomé Amado
Editora: Maria Auxiliadora
