DILI, 04 dezembru 2023 (TATOLI)–Primeiru-Ministru (PM), Kay Rala Xanana Gusmão, akompaña hosi Ministra Finansa, Santina Cardoso, segunda ne’e, hala’o enkontru ho Diretora Banku Mundiál hosi Jakarta-Indonézia, Satu Kahkonen inklui Reprezentante Banku Mundiál iha Timor-Leste, Bernard Harbone, hodi diskute kona-ba kooperasaun serbisu.
“Timor-Leste nafatin koopera ho Banku Mundiál hodi ajuda Governu Timor-Leste durante ninia mandatu bele hala’o no implementa projetu dezenvolvimentu infraestrutura ne’ebé sei kore povu no nasaun hosi kiak no mukit,” Xefe Governu hateten hafoin reuniaun, iha Palásiu Governu.
Notísia relevante : Xefe Estadu, IFC no Banku Mundiál diskute dezenvolvimentu ekonómiku
Iha biban hanesan, Diretora Banku Mundiál hosi Jakarta-Indonézia, Satu Kahkonen, informa, Banku Mundiál kontinua apoia programa no projetu dezenvolvimentu hotu ne’ebé Governu hala’o.
“Ami sei kontinua ajuda Timor-Leste ninia prosesu dezenvolvimentu iha área bázika sira hanesan kontrusaun infraestrutura, bee-moos, agrikultura no seluk tan,” Satu Kahnonen realsa.
Durante ne’e Banku Mundiál fó ona apoia fundu empréstimu ba Governu Timor-Leste hodi implementa projetu dezenvolvimentu infraestrutura iha Timor-Leste.
Jornalista : Antónia Gusmão
Editora : Julia Chatarina
