DILI, 05 dezembru 2023 (TATOLI) – Diretór Nasionál Prevensaun no Kontrolu Moras iha Ministériu Saúde, Florindo Gonzaga, hateten katak moras pneumonia ho númeru aumenta iha fasilidade saúde sira iha territóriu nasionál.
“Kazu pneumonia agora daudaun ne’e sa’e makas iha ita fasilidade saúde iha territóriu nasionál, ida-ne’e mós tama hanesan Infesaun Vias Respiratóriu Aguda (ISPA) ne’ebé mak iha kazu kumulativu hamutuk husi implikasaun ba klimátika sira hanesan fatór importante ida bele provoka respiratóriu hotu tantu iha ita-nia sistema sira”, Diretór Nasonál Prevensaun no Kontrolu Moras iha Ministériu Saúde, Florindo Gonzaga ba jornalista iha JL Vila, ohin.
Nia dehan, atu kombate moras ne’e mak atividade promosaun saúde halo nafatin, sensibiliza informasaun ba komunidade sira kona-ba maneira prevensaun oinsa ema bele kuida saúde.
“Prevensaun ba ida-ne’e mak nafatin relevansia nian ita iha atividade promosaun saúde ne’ebé mak ita halao no mós ita nafatin sensibiliza informasaun ba ita-nia komunidade sira kona-ba maneira prevensaun oinsá ita kuidadu ita-nia saúde atu ita labele monu iha kazu grave sira”, nia esplika.
Iha sorin seluk, Xefe Sentru Saúde Comoro, Emilia Ayati de Sousa, informa durante fulan setembru ho fulan outobru, moras ne’ebé rejistu aas liu mak Infesaun Vias Respiratória Agudu (ISPA) no moras sira seluk.
“Iha fulan setembru moras ISPA hamutuk 6.923 no iha fulan outobru hamutuk 6.817, depois tuir mai fali mak moras kulit, iha fulan setembru hamutuk 1.184 no iha fulan outubru hamutuk 1.559, depois moras diarea, iha setembru 1.171 no outobru 1.501”, nia relata.
Diretór Klínika Bairo Pite, Inacio dos Santos, informa kazu pneumonia mós nafatin rejistu iha Klínika Bairu Pite.
“Kada fulan ita rejista kazu pneumonia hamutuk 20 ba leten, ne’ebé ita presiza halo atensaun tanba kazu kona barak mak labarik sira no ema boot, ne’ebé ita presiza halo intervensaun”, nia konklui.
Jornalista : Felicidade Ximenes
Editór : Zezito Silva
