Gabinete Fronteira Terrestre no Marrítima estabelesidu hodi konsentra ba prosesu negosiasaun

DILI, 06 dezembru 2023 (TATOLI)—Governu liuhosi reuniaun ordinária Konsellu Ministru, kuarta ne’e, aprova ona Projetu Dekretu-Lei, ne’ebé aprezenta hosi Primeiru-Ministru, Kay Rala Xanana Gusmão, hodi kria Gabinete Fronteira Terrestre no Marrítima (GFTM).

“Diploma ida-ne’e ho objetivu atu define estrutura no kompeténsia Konsellu ba Delimitasaun Definitiva Fronteira Marrítima, ne’ebé konsentra ba esforsu no rekursu ba prosesu negosiál iha Gabinete Fronteira Terrestre no Marrítima, iha Primeiru-Ministru ninia okos,” haktuir nota ne’ebé Agência Tatoli asesu hafoin reuniaun ezekutivu, iha Palásiu Governu kuarta ne’e.

Notísia relevante : Timor-Leste no Indonézia asina tratadu fronteira terrestre iha janeiru 2024

Kriasaun gabinete ne’e atubele define kondisaun no objetivu nesesáriu sira ne’ebé fó dalan atu konklui tratadu ne’ebé estabelese fronteira terrestre no marítima ho Repúblika Indonézia.

GFTM sei responsável tulun Primeiru-Ministru halo konseitu, dezenvolve no implementa polítika ‘Ekonomia Azul’ Timor-Leste.

Jornalista      : Antónia Gusmão

Editora           : Julia Chatarina