Governu hahú reativa tratamentu pasaporte iha Oé-Cusse
OÉ-CUSSE, 11 dezembru 2023 (TATOLI – Governu liuhosi Ministériu Justisa (MJ), segunda ne’e reativa hikas no loke ba públiku kona-bá prosesu tratamentu emisaun no renovasaun pasaporte eletrónika iha Rejiaun Administrativa Espesiál Oé-Cusse Ambeno (RAEOA).
Diretór Servisu Rejistu Sivíl Notariadu Oé-Cusse, Rui Sequeira Monis, informa, prosesu tratamentu pasaporte ne’e loke ba públiku no laiha limitasaun ba sidadaun hotu.
“Durante ne’e ita iha fallansu kaderneta iha nasionál mós hotu, agora ita foin hahú fila-fali, ne’ebé komesa ohin loron ami atende pasaporte ba Oé-Cusse nian,” mia ko’alia iha Oé-Cusse.
Notísia relevante:Autoridade RAEOA nomeia Rui Pereira lidera notariádu Oé-Cusse
Nia informa, prosesu tratamentu pasaporte ho tipu rua de’it, ho folin $50,00 durasaun ba semana rua no $75,00 durasaun ba semana ida.
Enkuantu ba urjénsia ho durasaun loron ida de’it ho presu $100,00 hosi ministériu la autoriza tanba nasionál tratamentu loron ida nian sei barak, nune’e autoriza de’it munisípiu loke ho durasaun normál.
“Ohin foin hahú, ne’ebé ami atende lai, ba oin ami sei limita kada loron loke de’it ba ema na’in-30 to’o 40 nune’e labele mosu barullu ka dudu malu,” nia dehan.
Tuir nia, tramentu pasaporte ne’e la fó impaktu ba tratamentu billete identidade ho sertidaun RDTL, bom komportamentu, óbitu no sertidaun kazamentu atendimentu kontinua hanesan bainbain.
Iha biban ne’e Rozalina Eulaliu Ferão, agradese ba Governu, tanba hahú loke hikas tratamentu pasaporte, nune’e bele estende no mós halo foun pasaporte iha Oé-Cusse.
“Agradese tebes tanba ohin loron, Governu fó oportunidade atu ami bele halo ami-nia pasaporte hodi bele viajen ba rai-li’ur karik bele iha legál, tanba problema ne’e tinan naruk ona maibé ohin di’ak ona,” nia orgullu.
Notísia relevante:Autoridade RAEOA hato’o pontu haat ba Parlamentu Nasionál atu Governu Sentrál konsidera
Jornalista: Abílio Elo Nini
Editór: Evaristo Soares Martins
