OÉ-CUSSE, 11 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), nomeia Rui Pereira Monis Sequeira, lidera Diresaun Rejionál Konservatóriu Servisu Rejistu Sivíl Notariadu (DRCSRN, sigla portugés) Oé-Cusse Ambeno.
Antes ne’e Ministériu Justisa (MJ) liuhosi Diresaun Jerál Servisu Rejistu Notariadu Nasionál hato’o pedidu ofisiál ida ba Autoridade RAEOA, pedidu ne’e ho númeru referénsia 668/DGRSRN/X/2023, iha loron 10 outubru 2023, ho asuntu pedidu nomeiasaun foun iha Diresaun Munisipál Konservatóriu Notariadu Oé-Cusse.
Notísia relevante: MJ hato’o pedidu ba Autoridade nomeia Rui Pereira lidera Notariádu Oé-Cusse
Karta ofisiál, Agência Tatoli, asesu iha Gabinete Prezidente Autoridade RAEOA, sesta ne’e (10/11/2023) katak, nomeisaun ne’e ba kargu foun ne’e, ho karta despaxu númeru 11/XI/2023/PA/RAEOA no ZEESM-TL.
“Prezidente Autoridade RAEOA, uza nia kompeténsia própria, prevista iha estatutu RAEOA, liuhosi Dekretu-Lei númeru 5/2015, loron 22, fulan janeiru, ártigu 24, némeru 1 alinea r, hodi deside, nomea Rui Pereira Monis Sequeira, ba kargu Diretór Rejionál Konservatóriu Servisu Rejistu Sivíl Notariádu Oé-Cusse Ambeno,” refere iha karta ofisiál ne’ebé Agência Tatoli Asesu.
Notísia relevante: Fasilidade atendimentu iha Rejistu Sívil Notariadu RAEOA presiza manutensaun
Iha karta nomeiasaun ne’e, Prezidente Autoridade, Arsénio Paixào Bano, rekomenda kompeténsia sira ba diretór DRCSRN, Rui Pereira Monis Sequeira, atu kumpri pontu sira (9) hanesan.
Primeiru, dirije no orienta no koordena servisu administrasaun Diresaun Rejionál Konservatóriu Servisu Rejistu Sivíl Notariadu Oé-Cusse, daruak, garante rekursu umanu iha diresaun, disponivel ba funsionamentu no sustentabilidade ba atendimentu públiku.
Datoluk, elabora planu atividade no parséria ho konservadór sira iha notariadu, dahaat, reprezenta DRCSRN, servisu hamutuk ho ho entidade sira ne’ebé estabelese iha Oé-Cusse Ambeno, Dalima, superviziona no implementa norma regulementu sira hodi ezekuta atividade sira iha rejístu sivíl Oé-Cusse.
Daneen, fiskaliza no kontrola atividade disiplina funsionáriu sira iha nível DRCSRN, prepara instrusaun ne’ebé nesesáriu hodi mellora funsionamentu DRCSRN, hodi submete no konsidera ba aprovasaun sira iha Prezidente Autoridade RAEOA, inklui partisipasaun infrasaun dixiplina kona-bá pesoál iha diresaun.
Dahitu, supervziona no kontrola instalasaun ekipamentu sira iha DRCSRN, ba kartóriu sira no postu atendimentu sira.
Daualu, aprezenta relatóriu periódika relativamente ba progresu servisu iha DRCSRN ba Prezidente Autoridade RAEOA ho koñesimentu hosi Sekretáriu Rejionál ba Asuntu Terra propriedade, dasia, hala’o kompeténsia sira kumpri regulamentu lei sira.
Notísia relevante: Iha 2022, Rejistu Sivíl Notariadu RAEOA rekolla reseita rihun $54-resin
Entretantu, Diretór sesante DRCSRN José Ase Neno Colo, asumi kna’ar nu’udar Diretór Servisu Rejistu Sivíl Notariadu iha RAEOA kuaze tinan ualu, hahú hosi 2016 to’o 2023 ne’e.
Jornalista: Abílio Elo Nini
Editór: Evaristo Soares Martins
