Governu husu xefe suku sira tenke ativu iha sede suku
BOBONARO, 11 dezembru 2023 (TATOLI) – Ministériu Administrasaun Estatál (MAE) liuhosi Diretór Nasionál Apoia Administrasaun Suku (DNAAS), Cesaltino Marques, husu xefe suku sira tenke ativu iha sede suku nune’e fó atendimentu ba povu ne’ebé presiza.
Diretór Nasionál Apoia Administrasaun Suku, Cesaltino Marques, ko’alia asuntu e’e iha atividade formasaun ba xefe suku 50 iha munisípiu Bobonaro kona-bá kna’ar no kompeténsia ba jestaun finanseira suku no prenximentu livru administrasaun suku.
Formasaun durante loron tolu ne’e realiza ho Objetivu atu eleva líder komunitária sira-nia koñesimentu no abilidade atubele tulun ezerse funsaun tuir kompeténsia sira nakait ho enkuadramentu legál sira-ne’ebé konsagra ona iha Lei Suku númeru 09/2016.
Diretór Nasionál Apoia Administrasaun Suku (DNAAS), Cesaltino Marques, husu ba líder komunitária iha munisípiu Bobonaro, atu labele abandona servisu ba Povu, tanba xefe suku mak hanesan liman-ain governu iha baze hodi halo atendimentu hasoru komunidade.
Notísia relevante: Kontratu ba PAAS 452 termina iha 31 dezembru
“Ita-boot sira tenke halo atendimentu suku di’akliu, sede suku tenke moos, atendimentu loke loron loron, povu mai labele hamriik iha ai-hún, uma-okos sira-ne’e, ita lakohi, haree fatin trata sira ho dignu, tanba sira presiza mak mai, kasian sira lao do’ok mak mai to’o sede suku mak xefe suku laiha, nia mate hamlaha, nia hili ita-boot atu halo saida, sé ita la atende, nia bele halai ba sorin, tanba Bobonaro hela iha fronteira,” nia hateten iha salaun Administrasaun Munisipál Bobonaro.
Nia mós dezafia xefe suku, liuliu sira-ne’ebé ho idade sei joven, atu hatudu ezemplu di’ak hodi apoia totál dezenvolvimentu iha suku.
“Labele impede fali dezenvolvimentu, sé lae imi mak rugi, agora governu klaru atu halo projetu eletrisidade, ezemplu iha Leo-hitu, se iha impedimentu, nia mai foti lori ba fali seluk, tanba ema hotu presiza, la’ós suku ne’e de’it, ne’ebé dezenvolvimentu kuandu tama aproveita kedas, atu imi-nia mandatu tinan hitu bele halo netik buat ruma ba Povu,” nia fó hanoin.
Prezidente Autoridade Munisípiu Bobonaro, Ernesto de Oliveira Barreto, konsidera formasaun ne’e importantes tebes atubele tulun xefe suku sira hatene no kompeténsia ne’ebé sira bele halo no labele halo iha kna’ar loron loron durante tinan hitu.
Nia apela ba xefe suku sira atubele serbí povu ho responsabilidade hodi responde sira-nia nesesidade ne’ebé presiza.
“Sira-nia presiza ne’e atendimentu ne’e mak tenke tau prioridade númeru um, ita bele servisu bainaka barak, dokumentu barak, husik hela lai, atende uluk mak sira, ema ne’e mai ho ojek, ita la atende, aban nia tenke mai fali. Ida-ne’e labele, tanba ita sai xefe suku atu serbí sira, labele halo sira mak tuituir ita loron kalan,” nia hateten.
Enkuantu rezultadu eleisaun órgaun suku liubá hatudu suku 50 iha munisípiu Bobonaro, iha xefe suku re-eleitu 22 no eleitu 28. Hosi númeru ne’e feto ida mak lidera suku Leo-hitu, postu administrativu Balibo.
Notísia relevante: Ministra Edukasaun husu Xefe Suku iha Maliana atu servisu ho povu
Jornalista: Sérgio da Cruz
Editór: Evaristo Soares Martins
