COVALIMA, 12 dezembru 2023 (TATOLI) – Komandu Polísia Nasionál Timor-Leste (PNTL) Covalima indentifika sidadaun na’in-lima ne’ebé sunu fogete tanba kontra orientasaun ne’ebé fó sai katak bandu labele sunu, fa’an no importa sasán refere durante prepasaun loron natál no tinan foun nian.
“Ita identifika sidadaun balun ne’ebé sunu fogete hodi buka tuir sé maka fa’an ba sira, nune’e ita aplika sansaun”, Komandante PNTL Covalima, Superintendente Polísia Calisto Gonzaga, hatete ohin.
Komandante ne’e salienta katak PNTL Covalima detein sidadaun nain-lima hodi husu informasaun ba sira sosa fogete iha ne’ebé tanba balun mai husi dalan ilegál. “Husu ba sidadaun sira labele sunu fogete iha tempu adventu, tempu ne’ebé atu hasa’e orasaun la’ós tempu ne’ebé atu sunu fogete”, dehan.
Iha sorin seluk, negosiante Aurélia Doutel Sarmento solisita ba Polísia atu buka sidadaun sira ne’ebé fa’an fogete ba sira iha merkadu no sira kontinua fa’an tutan ba ema seluk.
“PNTL labele fó sala ba ami ne’ebé fa’an fogete iha merkadu. Ami fa’an tanba iha sidadaun balun maka fa’an fó ami. Entaun, ami sosa no fa’an tutan iha merkadu”, Aurélia Doutel lamenta.
Nia salienta fogete ne’ebé sira sosa ne’e liuhusi dalan legál ka la’e nia laiha informasaun, maibé sujere ba polísia sira atubele buka hatene hodi halo pasa revista iha fronteira.
Antes ne’e, PNTL Covalima bolu ona emprezáriu no loja na’in sira ne’ebé hodi fó informasaun atu labele importa no fa’an produtu ne’e iha merkadu.
Notísia relevante: PNTL Covalima bandu sidadaun sira sunu fugete
Jornalista: Celestina Teles
Editora: Maria Auxiliadora
