DILI, 12 dezembru 2023 (TATOLI)—Prezidente Repúblika (PR), José Ramos Horta, simu vizita ida hosi Reprezentante espesiál Greater Sunrise Austrália, Steve Barcks, hodi ko’alia kona-ba prosesu dezenvolvimentu kampu petrolíferu Greater Sunrise.
Bainhira ramata enkontru, Steve Barcks, haktuir katak, Xefe Estadu apoia maka’as ba estudu viabilidade foun no iha esperansa katak iha inan oin bele iha ona rezultadu hodi avansa ba oin.
“Seidauk iha resposta pozitivu liuhosi enkontru hirak ne’e, maibé espera liuhosi rezultadu estudu konseitu ne’ebé la’o daudaun, meadu tinan-oin ita bele iha ona resposta foun kona-ba dezenvolvimentu Greater Sunrise,” Reprezentante espesiál, hateten, iha Palásiu Prezidensiál, Bairru-Pité, tersa ne’e.
Notísia relevante : Austrália prefere halo estudu viabilidade foun ba dezenvolvimentu Greater Sunrise
Steve Barcks konfirma tan katak, Austrália prefere estudu foun tanba estudu antes ne’e la nesesita ona ho situasaun atuál.
“Tanba estudu antes ne’e tempu la hanesan no agora buat barak ne’ebé iha mudansa. Hanesan iha Austrália mekanizmu foun oinsá atu kuidadu no haree Planta LNG sira ne’e, merkadu mós foun no iha akordu oin-oin ne’ebé envolve iha projetu mina no gás nian, entaun Austrália hein rezultadu ne’ebé hala’o daudaun ne’ebé tuir tempu ida agora,” nia akresenta.
Barcks nota katak projetu Bayu-Undan besik ramata ona, tanba ne’e projetu kampu petrolíferu foun ne’e importante tebes atu dezenvolve projetu Greater Sunrise, importante ba Timor atu kontinua hetan rendimentu ne’ebé sei ajuda Timor-Leste nia ekonomia.
Aleinde ne’e, Austrália iha esperansa katak, estudu foun ne’e sei ramata iha tinan oin, tanba ne’e ekipa sira serbisu maka’as hodi kontinua la’o ba oin.
“Iha negosiasaun tékniku ne’ebé la’o barak, no hamutuk, tanba hosi parte rua ne’e iha interese atu projetu ida-ne’e dezenvolve iha tempu badak,” nia tenik.
Jornalista : Antónia Gusmão
Editora : Julia Chatarina
