BOBONARO,13 dezembru 2023 (TATOLI) – Asosisaun Defisiénsia Timor-Leste (ADTL) husu Autoridade Munisípiu Bobonaro envolve Ema ho Defisiénsia iha kualkér planu ba dezenvolvimentu.
Diretór Ezekutivu ADTL, Cesário da Silva, husu Autoridade Munisípiu Bobonaro (AMB) atu inklui no fó oportunidade barak ba ema ho defisiénsia sira atu hola parte iha prosesu dezenvolvimentu ba munisípiu ne’e.
Tuir nia, ema ho defisiénsia mós iha kbiit no kapasidade atu kobtribui ideia hodi dezenvolve munisípiu Bobonaro.
Notísia relevante: AHDRO husu AMB prioriza asuntu defisiénsia iha OJE 2024
“Ami haree dezenvolvimentu munisípiu komesa hahú ona iha prosesu planeamentu komesa la’o maka’as, ami rekomenda autoridade munisípiu, planeamentu sira-ne’e favór inklui ema ho defisiénsia sira, konsulta ho sira, hodi rona sira-nia hanoin no ideia oinsá bele asegura ema ho defisiénsia, trotoár, edifísiu sira-ne’e difikulta ami-nia maluk defisiénsia sira ho kadera roda atu asesu,” nia hateten.
Tuir nia, ohin loron EhD iha munisípiu Bobonaro seidauk hetan direitu protesaun própriu tanba fasilidade no edifísiu públiku sira barak iha munisípiu ne’e seidauk iha asesibilidade ba EhD.
“Ha’u husu ba Autoridade Munisípiu no autoridade postu ho nia estrutura to’o iha baze, liuliu xefe suku sira, dezenvolvimentu iha setór hotu ne’ebé trasa iha munisípiu Bobonaro, ita presiza intregra asuntu defisiénsia,” nia propoin.
Reprezentante Prezidente Autoridade Munisípiu Bobonaro, Rosário Gonçalves, rekoñese iha tinan hirak ba kotuk la konsege fó prioridade no oportunidade ba ema ho defisiénsia.
Maibé nia dehan, agora autoridade Bobonaro liuhosi Diresaun Programa Nasionál Dezenvolvimentu Suku (PNDS) komesa tau ona prioridade ba ema ho defisiénsia liuhosi konstrusaun Uma Naroman ba Povu (UNP).
“Ha’u hakarak fó hatene, ita iha Bobonaro halo ona uma 40 ba ema ho defisiénsia. Hosi uma sira-ne’e ba feto na’in-10 no Mane 30, uma sira-ne’e ho kompletu ho kedas ninia rampa, atu sira bele asesu ho kadeira roda, munisípiu mos sei esforsu ba oin, karik iha posiblidades sira sei hetan barak liután,” nia katak.
Enkuantu autoridade Munisípiu Bobonaro mós iha Diresaun Asaun Sosiál, Diresaun Apoia Organizasaun Sosiedade Sivíl no Diresaun Planeamentu Dezenvolvimentu Infraestrutura Munisípiu ne’ebé servisu iha relasaun ba Asuntu defisiensia.
Asuntu hirak-ne’e toka liuhosi Asosiasaun Halibur Defisiénsia Rejiaun Oeste (AHADRO), hamutuk ho Asosisaun Defisiénsia Timor-Leste (ADTL), kuarta ne’e realiza atividade semináriu nível munisipál kona-bá promosaun no protesaun direitu ema ho defisiénsia, ne’ebé hala’o iha Jináziu Maliana, munisípiu Bobonaro hodi komemora loron mundiál defisiénsia.
Notisia relevante: ADTL husu instituisaun hotu tenke garante asesibilidade ba ema ho defisiénsia
Jornalista: Sérgio da Cruz
Editór: Evaristo Soares Martins