DILI, 13 dezembru 2023 (TATOLI)–Ema deskoñesidu tuda rahun vidru janela Gabinete Fronteira Marrítima, ne’ebé lokaliza iha Palásiu Governu.
Xefe Seksaun Diresaun Nasionál Seguransa Patrimóniu Públiku (DNSPP) Palásiu Governu, António Soares Manuel, haktuir, sira-nia parte simu informasaun hosi parte seguransa sira katak, akontesimentu ne’e iha madrugada tuku 03:00, kuarta (13/12).
Nia dehan, hafoin akontesimentu vidru ne’e rahun, ekipa seguransa sira hala’o kedas identifikasaun, ne’ebé deskonfia ema deskoñesidu tuda hosi li’ur maibé informasaun ne’e seidauk klaru loloos, tanba sira-nia parte sei aprezenta relatóriu ba Komandante DNSPP hodi koopera ho Komandu Polísia Nasionál Timor-Leste (PNTL) liuhosi Seksaun Investigasaun Kriminál (SIK) no Servisu Informasaun Polísia (SIP) maka sei halo prosesu investigasaun kle’an.
“Akomentesimentu ne’e dehan ohin dadeer madrugada, maibé ami seidauk bele hatene klaru, tanba ami deskonfia ema tuda hosi li’ur maka tama mai kona vidru ne’e rahun kedas, ne’ebé ami sei relata relatóriu ba komandante sira ho ita-nia Polísia sira atu mai halo investigasaun kle’an,” António haktuir ba jornalista-sira, iha Palásiu Governu, Kuarta ne’e.
Notísia relevante : Gabinete Fronteira Terrestre no Marrítima estabelesidu hodi konsentra ba prosesu negosiasaun
Hafoin akontesimentu, Primeiru-Ministru, Kay Rala Xanana Gusmão, hala’o kedas vizita hodi haree direita sala Sekretaria Gabinete Fronteira Marrítima ne’ebé ema tuda rahun no husu kedas ba parte seguransa sivíl atu koordena ho PNTL hodi loke prosesu investigasaun.
Edifísiu Gabinete Fronteira Marrítima ne’ebé ema tuda rahun hosi parte kotuk besik malu ho Gabinete g7+ nian, ne’ebé besik kedas área estrada.
Entretantu, Komandante SIP, Superintendente Asistente Polísia, Boavida Ribeiro no Servisu Nasionál Intelejénsia (SNI) to’o kedas areadór Gabinete Fronteira Marrítima hodi halo indentifikasaun ba kronologia akontesimentu.
Durante halo indentifikasaun, SIP identifika fatuk ne’ebé ema deskoñesidu uza tuda rahun vidru monu hela iha sala laran, sai nu’udar evidénsia ida ba parte PNTL Seksaun Servisu Investigasaun Kriminál hodi halo identifikasaun liután.
Jornalista : Antónia Gusmão
Editora : Julia Chatarina
