OÉ-CUSSE, 13 dezembru 2023 (TATOLI – Asosiasaun Halibur Defisiénsia Matan Timor-Leste (AHDMTL), hamutuk ho Provedoria Direitu Umanu no Justisa (PDHJ), kuarta ne’e selebra loron Internasionál Direitu Umanu ba dala-75 iha suku Nipani, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Loron 10 dezembru, nu’udar loron aniversáriu Deklarasaun Universál Direitu Umanu ba dala-75, nune’e AHDMTL hamutuk PDHJ no parséria sira selebra iha Oé-Cusse ho tema ‘Liberdade, Igualdade no Justisa ba ema hotu’.
Notisia relevante: AHDMTL triste Governu la fó prioridade ba asuntu “Ema ho Defisiénsia”
Diretór Ezekutivu AHDMTL, Gabriel Ponciano de Sousa, hateten, intensaun AHDMTL komemora loron internasionál ne’e, tanba haree hosi deklarasaun universál Nasaun Unida nian, oinsá atu defende direitu ema hotu nian, liuliu defende ema ho vulnerável sira, no defende ema hosi violasaun direitu umanu.
Nia hateten, iha Timor-Leste ratifika ona konvensaun internasionál lubun, inklui mós deklarasaun universál ida, Timor-Leste mós ratifika no implementa daudaun ona, no tinan ne’e, Timor-Leste komemora loron internasionál Direitu Umanu ba dala-75.
“Maibé ita haree momoos liuhosi observasaun katak, nafatin violasaun direitu umanu iha Timor-Leste sei aas, entaun hosi ema ho defisiénsia sira mós hasoru nafatin violasaun direitu umanu, tán ne’e liuhosi eventu sira-ne’e, ita ejize ita-nia direitu ba parte relevante sira, tanba Estadu Timor-Leste iha ona komitmentu hodi ratifika konvensaun internasionál direitu ho ema defisiénsia, maibé sira rasik laiha vontade atu implementa konvensaun hirak-ne’e hotu,” Gabriel Ponciano de Sousa, ko’alia iha ámbitu komemorasaun ne’e.
Nune’e Diretór Ezekutivu AHDMTL, apela hamutuk ho komunidade vulnerável sira kontinua luta ba direitu umanu iha Timor-Leste hamutuk ho parte relevante sira, husu ba autoridade lokál sira, atubele fó liberdade ba hotu, goza direitu ho livre iha fatin públiku sira.
“Tanba prinsípiu hosi direitu umanu ne’e maka promove, proteje, rekoñese no respeita, ita rekoñese sidadaun ho defisiénsia tenke respeita sira-nia direitu, rekoñese defisiénsia hanesan ita-nia sidadaun tenke respeita sira-nia direitu, ita hakarak promove nia, tenke proteje liuhosi asesibilidade labele fó kariedade maibé presiza oportunidade.”
Notisia relevante:AHDMTL fasilita formasaun bázika ba defisiénsia matan RAEOA
Prezidente Autoridade RAEOA sesante, Arsénio Paixão Bano, agradese ba AHDMTL, maske liu ona loron aniversáriu maibé iha komitmentu nafatin atu realiza alvu ba suku sira.
“Ida-ne’e atu reafirma katak, Estadu ema hotu-hotu iha responsabilidade ba povu tomak, ne’e inklui ema ho defisiénsia oinoin, entaun ohin ita selebra atu semangat ba ita hotu, iha uma-kain sira iha família enfrenta problema defisiénsia, labele lakon vontade ho esperansa tanba iha dalan atu rezolve tanba ita umanu,” nia fó hanoin.
Xefe aldeia, Sakatu Suku Nípani, José Abi, agradese ba tanba AHDMTL hili suku Nípani atu loron aniversáriu Deklarasaun Universál Direitu Umanu ba dala-75.
Notisia relevante: MSSI seidauk transfere osan $54.000 ba AHDMTL
Jornalista: Abílio Elo Nini
Editór: Evaristo Soares Martins
