DILI, 13 dezembru 2023 (TATOLI) – Diresaun Nasionál Ensinu Rekorrente husi Ministériu Edukasaun sei kria tan Sentru Komunitáriu Aprendizajen (SKA) lima, iha tinan oin, tanba komunidade iha interese atu envolve iha atividade ne’ebé sentru halo.
Daudaun, eziste ona SKA sanulu iha kada munisípiu no Diresaun Ensinu Rekorrente prevee anualmente rihun $30 hodi apoia atividade iha sentru refere no kada sentru hetan rihun $3 hodi implementa programa.
Kriasaun SKA ne’e tuir polítika Ministériu Edukasaun nian ho objetivu atu apoia programa ekivalénsia no kontinua opta kursu sira ne’ebé maka depende ba estrutura SKA ida-idak kria.
“Diresaun Nasionál Ensinu Rekorrente prevee ona rihun $45 atu apoia tan sentru 15 [lima sei loke tan iha tinan oin]. Fiar katak liuhusi sentru sira ne’e bele akumula ema hotu ne’ebe maka iha problema ho edukasaun, nune’e bele prepara sira-nian futuru hodi hakat fali bá edukasaun formál tuir nesesidade ne’ebé iha”, Diretór Nasionál Ensinu Rekorrente, Alfredo de Araújo, informa iha Vila Verde, ohin.
Responsavel ne’e esplika katak osan sira ne’ebé diresaun disponibiliza ba sentru sira ne’e atu halo atividade sira hanesan artezanatu ka indústria ki’ik soru tais, homan no nia rezultadu sira bele lori bá fa’an iha merkadu.
Dirijente ne’e realsa tan katak Ministériu Edukasaun transfere kada tinan osan ba konta bankária SKA sira-nian. Molok atu simu fali fundu foun mak sira tenke aprezenta uluk relatóriu, nune’e bele hetan konsiderasaun husi ministériu katak verba ne’ebé sira simu jere duni ba atividade sira ne’ebé planeiada.
Notísia relevante: Sentru Komunitáriu Aprendizajen neen hetan subsídiu rihun $18 husi ME
Jornalista: Tomé Amado
Editora: Maria Auxiliadora
