DILI, 28 jullu 2023 (TATOLI) – Ministériu Edukasaun (ME) liuhusi Diresaun Nasionál Ensinu Rekorrente disponibiliza subsídiu rihun $18 ba Sentru Komunitáriu Aprendizajen (SKA) neen atu halo sira-nian atividade. Husi montante ne’e, kada sentru sei hetan rihun $3.
Sentru komunitáriu ne’ebé hetan subsídiu mak Cristo Rei Kriativu no Moravida Maskal Vera Cruz iha Dili, Sentru Kriativu iha Baucau, Futuru Rentau iha Manatuto, Knuuk bá Moris iha Manufahi no Kuda Ulun iha Bobonaro.
Diretór-Jerál Administrasaun no Jestaun Finansa, Antoninho Pires, husu ba dirijente sentru sira atu jere subsídiu ne’e ho responsabilidade hodi uza ba atividade sentru nian.
Programa sira ne’ebé maka hala’o iha sentru sira ne’e maka Kompeténsia Vida mak disponibiliza formasaun língua Koreia, Portugeza, informátika no kostura; Alfabetizasaun; no atividade regulár mak halo aprendizajen ba estudante sira ne’ebé maka lakon nia direitu iha eskola bázika, nune’e bele hetan formasaun iha edukasaun naun formál hodi bele hetan fali direitu tama ba ensinu sekundáriu.
Subsídiu ne’ebé Ministériu Edukasaun fó ba sentru neen refere bazeia ba relatóriu husi Diresaun Nasionál Ensinu Rekorrente, tanba sempre halo atividade prosesu aprendizajen ba alunu sira.
“Ba ita-boot sira ne’ebé simu subsídiu husi Governu tenke uza ho loloos no ba duni atividade sira, tanba ha’u rona iha sentru balun maka seidauk hetan direitu ba subsídiu ne’e tanba to’o agora seidauk relata sira-nian relatóriu ezekusaun iha 2022 nian”, Antoninho Pires hatete, ohin, iha serimónia asina akordu entre ME ho SKA sira, iha Vila Verde.
Diretór Nasionál Ensinu Rekorrente, Quitão da Costa Massa, haktuir katak durante ne’e iha ona sentru sanulu maka estabelese ona iha munisípiu sia, maibé foin iha sentru neen mak hetan apoiu.
Ba sentru sira ne’ebé seidauk simu ajuda finanseira, diresaun hein nafatin relatóriu sira, nune’e bele kontinua disponibiliza subsídiu atu labele sakrifika fali estudante sira ne’ebé partisipa ona atividade sira. Husi sentru sanulu ne’e rejista ona alunu hamutuk 477.
Prezidente SKA Munisípiu Dili, Felismino Tavares de Araújo, sente satisfeitu tanba sira-nian sentru kontinua hetan subsídiu husi Ministériu Edukasaun. Osan sira ne’e sei uza hodi halo duni atividade tolu refere, nune’e bele aselera prosesu aprendizajen ba estudante sira.
Tuir nia, iha sentru Kristu Rei Kriativu no Moravida Maskal rejista, ba tinan ida ne’e, estudante hamutuk 175.
“Espera katak durante fulan neen nia laran sira bele konklui ona atividade sira, liuliu programa ekivalénsia nivel eskola bázika ne’e atu atribui fali diploma formál ba estudante sira hodi kontinua estudu iha sekundária”, realsa..
Jornalista: Tomé Amado
Editora: Maria Auxiliadora
