iklan

NASIONÁL, HEADLINE, POLÍTIKA

ANP iha tinan oin sei loke hikas konkursu ba konstrusaun biblioteka nasionál

ANP iha tinan oin sei loke hikas konkursu ba konstrusaun biblioteka nasionál

Prezidente Autoridade Nasionál Petróleu, Gualdino do Carmo da Silva. Imajen Tatoli/António Daciparu

DILI, 14 dezembru 2023 (TATOLI)–Prezidente Autoridade Nasionál Petróleu (ANP), Gualdino do Carmo da Silva, hateten, iha ona desizaun, katak iha tinan 2024 atu loke hikas konkursu públiku ba konstrusaun biblioteka nasionál.

“Hahú daudaun hodi rezumu fali diskusaun ho parte hotu no konkorda ona ANP loke konkursu ida atu nune’e bele atrai investidór ka ema sira ne’ebé mak badaen ba dezeñu no konstrusaun ba biblioteka ne’e,” Prezidente ANP hateten hafoin partisipa iha asinatura kontratu fahe produsaun, iha Hotel Timor, kinta ne’e.

Nia dehan, antes ne’e iha duni empreza manán-na’in maibé sira retira ona, tanba ne’e daudaun tenke halo fali prosesu foun.

Orsamentu ne’ebé prevee ba konstrusaun refere hamutuk millaun $10 disponibiliza hosi empreza Eni ba Governu iha tinan 2009 bainhira sira sei halo hela perfurasaun mina iha Kitan, maibé daudaun la halo ona atividade refere, nune’e ezekutivu tenke uza tiha osan ne’e ba harii biblioteka nasionál.

Notísia relevante : Empreza konstrutora Biblioteka Nasionál rezigna-aan

Konkursu ne’ebé loke ona antes ne’e empreza internasionál Sanghai Construction mak sai manán-na’in, maibé tanba hasoru tiha difikuldade, nune’e deside rezigna-an.

Bioblioteka nasionál ne’e sei harii iha Hudi-laran, postu administrativu Dom Aleixo, munisípiu Dili no halo ona lansamentu ba fatuk dahuluk iha 16 agostu 2017 no halo serimónia hanesan iha loron 22 jullu 2022.

Medida rai ba konstrusaun biblioteka ne’e iha mil kuadradu 27. Empreza Eni asumi kompromisu ba finansia konstrusaun ho millaun $10. Governu mós disponibiliza ona orsamentu adisionál millaun $2,3 ba faze dahuluk konstrusaun, diresionadu ba edifikasaun morru no supervizaun ba konstrusaun edifísiu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!