DILI, 18 dezembru 2023 (TATOLI) – Profesór 1.499 ne’ebé sei termina sira-nia kontratu iha 31 dezembru 2023 kontinua ezije ba Ministériu Eduaksaun (ME) atu halo avaliasaun dezempeñu ba sira-nia servisu nune’e sira bele tama iha Rejime Espesiál nu’udar profesór permanente.
Portavóz profesór kontratadu 1.499, Agostinho Pinto afirma katak sira kontinua aseita atu mantein dekretu lei númeriu 31/2023, 31 de Maio, artigu 11 Rejime Espesiál. Maibé, hafoin iha fali avaliasaun dezempeñu nian bazeia ba deklerasaun katak profesór kontratadu 2023 laiha direitu atu prenxe formulária avaliasaun dezempeñu ne’e mak presiza atu hetan esklaresimentu.
Basá, nia haktuir, iha artigu 38 hateten ona katak bainhira ema ida hala’o ona ninia servisu dentru fulan neen ka tinan ida nia iha ona direitu bele hetan ona avaliasaun dezempeñu ba ninia servisu. Tanba la hetan avaliasaun ida-ne’e mak sira la hetan oporunidade atu hetan mós direitu hodi sai nu’udar profesór Rejime Espesiál. Tan ne’e, sira sujere ba Ministra Edukasaun atu rezolve kestaun refere hodi bele fó biban ba sira (profesór relevante) atu tama iha prosesu refere.
Notísia relevante: Ministériu Edukasaun deside loke konkursu foun ba profesór kontratadu sira iha 2024
“Ho durasaun tempu ne’ebé atu termina ona, ami-nia distinu ne’e ita-boot sira bele halo netik avaliasaun dezempeñu ba ami-nia servisu sira atu ami bele kumpre netik rekizitu sira hodi bele tama mós iha Rejime Espesiál atu sai profesór permanente,” Agostinho haklaken.
Maski nune’e, Ministra Edukasaun, Dulce de Jesus Soares hateten bazeia ba dekretu lei númeru 31/2023 nian katak profesór ne’ebé mak hetan ona avaliasaun dezempeñu ne’e bazeia ba durasaun tempu servisu hahú husi 2021 no 2022, enkuantu ba profesór sira ne’ebe mak hetan kontratu iha 2023 la tama iha prosesu avaliasaun. Tanba ne’e, Ministériu Edukasaun iha ona polítika ida di’ak sei loke fali vaga bolsa kandidatu ba profesór sira iha Timor laran tomak atu bele tuir teste iha tinan oin, 2024.
Ministra Dulce dehan ba profesór 1.499 iha salaun enkontru ME Vila Verde, segunda ne’e katak Ministériu kontinua konsistente ho polítika ne’ebé define ona katak sei la kontinua estende kontratu ba profesór sira, maibé sei loke de’it vaga bolsa kandidatu atu profesór sira bele halo kompetisaun.
Nia hatutan, polítika ME atu loke vaga bolsa kandidatu ba profesór sira iha 2024 ne’e sei laiha intervensaun. Maibé, teste ne’e sei loke ba públiku inklu ba profesór 1.499 ne’ebé mak sira-nia kontratatu sei termina iha fulan ida-ne’e. Karik sira hakarak kompete bele prepara sira-nia dokumnetu hotu depois prepara mós sira-nia rezultadu avaliasaun dezempeñu tinan ida nian depois bele submete ba iha rekursu umanu nune’e bele hetan konsiderasaun.
Notísia relevante: Opsaun rua ba profesór kontratadu ne’ebé seidauk elejivel ba rejime espesiál
“Bolsa kandidatu ida-ne’e ita sei loke prioridade ba profesór kada disiplina. Signifika, teste ne’e halo ba profesór bazeia ba méritu nune’e bainhira kuandu sira liu bele hanorin duni matéria ne’ebe mak eskola sira presiza,” Dulce tenik ba reprezentante profesór sira.
Tuir nia katak dalan di’ak liu mak profesór sira hotu atu servisu hamutuk ho Ministériu Eduaksaun atu hateke ba-oin hodi la’o tuir nafatin regra ne’ebe iha ona, atubele hola parte iha teste ne’ebé mak sei loke iha janeiru no fevereiru 2024 tanba dadus profesór 1.499 nian iha hotu ona.
“Ha’u husu ba imi na’in 1.499 ne’e bainhira ami loke ona bolsa kandidatu iha janeiru-fevereiru 2024 mai de’it hatama imi-nia dokumentu inklui avaliasaun dezempeñu nune’e bele reforsa mós ita-boot sira-nia aplikasaun iha teste bolsa kandidatu ne’e,” Dulce informa.
Jornalista: Tomé Amado
Editór: Rafael Ximenes de A. Belo
