DILI, 20 dezembru 2023 (TATOLI)—Ministru Negósiu Estrajeiru no Kooperasaun (MNEK), Bendito Freitas, hateten Embaixadór Índia aprezenta karta kredensiál ba Prezidente Repúblika, José Ramos Horta, no ofisilamente embaixadór Estadu Índia mai Timor-Leste.
Notísia Relevante: India observa atu harii embaxada iha Timor-Leste
“Entaun, ohin, embaixadór aprezenta nia kredensiál ne’e no nia hanesan embaixadór ofisialmente Estadu Índia nian mai Timor-Leste. Agora, Ita atu kolabora ho sira mak ita-nia Estadu no Governu tenke buka fatin hodi harii sira-nia embaixada, nune’e mós ita sei ba harii embaixada iha Índia ne’ebá. Ida-ne’e importante tebes atu ita harii iha tinan 2024,” Ministru Estranjeiru ne’e hateten ba jornalista sira, hafoin halo sorumutu ho Xefe Estadu, iha Palásiu Prezidénsia Nicolau Lobato, Bairru Pité, kuarta ne’e.
Tanba ne’e, ohin iha Palásiu prezidénsia, Prezidente Repúblika, José Ramos Horta, simu kredensiál hosi embaixadór Índia akreditadu mai Timor-Leste no ohin simu ona kredensiál, nune’e ohin enkontru ho Prezidente Repúblika ne’e espresa tebe-tebes espekulasaun importansaun kooperasaun bilaterál entre Timor-Leste ho Índia.
“Asuntu prioridade tebes mak Índia nia intensaun no dejezu atu koopera no funsiona ona embaixada iha Índia. No, tempu hanesan halo reseprionisidade razaun imperativa polítika. Timor-Leste iha planu atu harii ona ita-nia embaixada Timor-Leste iha Índia, nune’e bele artikula no mós kanaliza ita-nia kooperasaun nível ida maibé apropriadu no elevadu. Tanba, ita hatene katak Índia super potente tebes iha entermu ekonómiku no nu’udar mós ho nia populasaun barak,” nia dehan.
Nia dehan, sira-nia dezenvolvimentu iha área oioin hanesan siénsia teknolojia, agrikultura, medisina no informasaun nian.
“Foin lalais ne’e ita-nia embaixadór hateten konvida ita-nia Prezidente Repúblika atu halo viajen ofisial ba Índia. Atu nune’e, asegura liután Índia nian ho ita-nia nasaun no mós embaixadór Índia ne’ebé iha rezidénsia Jakarta akreditadu mai Timor-Leste. No, futuramente apoiu kiikoan ruma mai Timor-Leste liuliu enerjia renovável, formasaun ba diplomata sira no mós apoiu ba estudante sira,” nia dehan.
Governante ne’e hateten, posibilidade Índia mós sei apoiu kona-ba kosteira máritima iha Timor-Leste.
“Ha’u lakohi avansa informasaun maibé sira mós sei apoiu kona-ba kosteira marítima ne’ebé posivelmente sei apoiu no deklara ida-ne’e bainihira ita-nia Prezidente Repúblika futuramente halo vizita ba Índia,” nia dehan.
Relasiona ho asuntu ne’e, Prezidente Repúblika fó nia ideia kona-ba situasaun infraestrutura kapitál Dili, parese uma ka fatin ruma bele hahú temporariamente sira bele hahú no depois mak sira bele deside.
Jornalista : Osória Marques
Editór : Cancio Ximenes
