DILI, 02 outubru 2023 (TATOLI) – Governu India liuhosi Ministru Negósiu Estranjeiru Rajkumar Ranjan Singnh vizita Timor-Leste hodi observa situasaun Timor-Leste nian ho objetivu atu harii embaxada India iha nasaun ne’e.
“Ministru Negósiu Estranjeiru India Rajkumar Ranjan Singnh mai Timor-Leste refleta katak kompromisiu hosi Governu India mai Timor-Leste atu fortifika ita-nia parseria atu haree ita-nia situasaun hodi konfirma sira-nia vontade atu harii embaxada iha Timor-Leste, nune’e mós ita atu loke ita nia embaxada iha India”, Ministru Negósiu Estranjeiru no Kooperasaun (MNEK) Bendito Freitas ba jornalista sira iha edifísiu MNEK, segunda ne’e.
Tuir nia, India kompromete atu apoia Timor-Leste iha múltiplu setór.
“India komprometidu atu apoiu nafatin ita liuliu kona-ba bolsu estudu, kooperasaun iha área saúde, formasaun ba diplomata, iha tempu besik atu apoiu mós ba ita iha setór farmaseutiku atu loke indústria, tanba ita hatene katak ai-moruk iha mundu ne’e barak liu prodúz iha India”, nia dehan.
Ministru revela, India importante tebes atu servisu hamutuk ho Timor-Leste atu haree ba interese dezenvolvimentu Timor-Leste atu di’ak liubá oin.
Jornalista: Hortencio Sanchez
Editór : Zezito Silva
