DILI, 28 de dezembru 2023 (TATOLI)–Sekretáriu Ezekutivu Consellu Nasionál Juventude Timor-Leste (CNJTL), Mateus Lemos Soares, husu ba líder polítiku sira no veteranu hotu atu mantein konsensu polítika nasionál no hametin unidade atubele fó solusaun ba interesse Estadu liuliu hamutuk lori dezenvolvimentu ba nasaun no povu ne’e.
Notísia Relevante: PR Horta-Alkatiri hakarak buka konsensu entre lidér nasionál
“Ami husu ba líder nasionál no polítiku hanesan Kay Rala Xanana Gusmão, José Ramos Horta, Taur Matan Ruak, Marí Alkatiri, Lere Anan Timur, Francisco Guterres ´Lú-Olo´ no veteranu atu mantein komunikasaun polítika hodi hametin unidade entre líder nasionál hotu, nune’e de’it mak bele fó solusaun ba problema nasaun no povu nian no bele husik hela lisaun di’ak ba jerasaun foun sira hodi banati tuir”, Sekretáriu Ezekutivu CNJTL ne’e dehan liuhosi konférensia imprensa, iha salaun Luz-Clarita, iha Lecidere-Dili.
CNJTL hato’o deklarasaun ne’e relasiona ho problema ekonomia,sosiál no infraestrutura ne’ebé sidadaun sira hasoru iha rai-laran. Nune’e diálogu entre lidér sira haree liu-liu oinsá buka konsensu nasionál hodi rezolve dezáfiu boot rai ida-nian ba oin hodi lori dezenvolvimentu liután.
“Presiza nafatin hametin unidade no bele ka’er metin prinsípiu unidade nasionál, respeita mútua hodi tane aas ita nia lema “Unidade, Asaun no Progressso” ba Timor independente, soberanu no prósperu”, nia fó hanoin.
Notísia Relevante: PM Taur apoiu oinsá buka konsensu entre lidér nasionál
Iha fatin hanesan, Prezidente CNJTL, Maria Dady Soares Magno, husu ba foinsa’e sira atu kontribui ba iha dezenvolvimentu nasionál, tanba ikus-ikus ne’e mosu problema barak.
“Felisitaun Natál ba imi foinsa’e hotu atu haku’ak malu tanba luta foun mak reziliente halo reflesaun, maske iha problema iha jornada moris. Tenke halakon hanoin aat iha tinan foun hodi hakmatek katak sente importante ba familia, sosiedade no kreda no nasaun”, nia sujere.
Tanba nia dehan, hahalok violénsia no hanoin aat la kontribui ba dezenvolvimentu nasionál la respeita kultura no relijiaun timorense. Se kontinua ho asaun sei reponde tuir lei hodi simu responsabilidade.
Nune’e, husu ba ba foinsa’e sira atu hatene hadi’a aan no badinas estuda no serbisu, tanba família, sosiedade no Estadu presiza joven sira tuir prinsípiu no valór kultura no relijiaun nian.
Notísia Relevante: PR Horta: “Ha’u-nia odomatan loke ba diskusaun buka dalan konsensu nasionál”
Jornaslita: Jesuína Xavier
Editór : Florencio Miranda Ximenes
