BOBONARO, 29 dezembru 2023 (TATOLI)-Progresu Fíziku Implementasaun projetu konstrusaun Uma Naroman ba Povu (UNP) regular faze daruak tinan 2022 iha Munisípiu Bobonaro, atinje ona 86,87% hosi totál uma Unidade 459.
Notísia relevante:UNP faze daruak 36 iha Bobonaro-Cailaco seidauk hahú
“Hosi númeru ne’e, ita konsege finaliza ona projetu ka uma 166 no projetu 293 On-Going ka la’o hela” Diretór Programa Nasionál Dezembolvimentu Suku (PNDS) Munisípiu Bobonaro, Rosario Mali dos Santos, aprezenta rezultadu ne’e iha reuniaun Konsellu koordenasaun Munisipál ikus tinan 2023, iha edifisíu Administrasaun Munisípiu Bobonaro, sesta ne’e.
Diretór ne’e relata projetu UNP + (A) ne’ebé implementa iha Postu administrativu Balibo ho totál unidade 75 daudaun ne’e progresu fíziku atinje ona 98,92% totál projetu 65 mak konklui ona falta 10 mak iha hela faze finalizasaun projetu.
Enkuantu, Projetu UNP + (B) ne’ebé implementa iha Postu administrativu Maliana ho totál benefisiáriu 259 no Bobonaro ho totál benefisiáriu 666.
“Iha Maliana uma-kain 83 mak seidauk troka Zinku, sira sei rai hela; mai fali iha Postu Bobonaro totál uma-kain ne’ebé mak troka ona Zinku ne’ebe sira simu 517 no kalen ne’ebé sira sei rai hela ne’e 249 mak sei rai, númeru ne’e barak demais, ami tuun ba observa, iha terrenu. Tuir loloos ne’e, fahe ba ema kbi’it naton, labele ba ida kbi’it laek los ne’e, tanba nia ai kuda-kuda dodok hotu laiha kbi’it atu sosa,entaun kalen nia sei rai hela,” Rosario tenik.
Enkuantu, projetu UNP regular 2021 Unidade tolu iha suku Colimau mak la’o atraza tebes to’o ágora mos seidauk finaliza, ho razaun tanba badaen mak abandona projetu.
“Tanba problema iha suku ne’e badaen ita buka susar la halimar, iha suku ne’e dalaruma projetu seluk iha badaen halai, tanba ema selu osan boot, PNDS selu osan ki’ik entaun nia halai ba ne’ebá. Ita atu ba bolu badaen, fatin seluk mós labele, tanba ne’e hau halo ona aproximasaun ho xefe suku foun eleitu, buka ona badaen, agora impelementa fali, komesa pinta ona iha tempu badak finaliza,” Diretór PNDS garante.
Progresu fíziku ba PNDS regular siklu (3)2021 atinje ona 93% hosi totál projetu 53 ne’ebé agora finaliza ona hamutuk 41 no 12 mak sei iha prosesu implementasaun. Enkuantu siklu PNDS regular siklu (4) 2022 atinje ona 65% hosi totál projetu 36 ne’ebé konklui ona hamutuk 9 falta 27 mak sei la’o hela.
Projetu Bee-moos, Irrigasaun no Estrada ne’ebé finansia hosi parseiru Governu Austrália ne’ebé implementa iha postu administrativu Cailaco, Balibo no Bobonaro ho totál 32, ne’ebé daudaun ne’e finaliza 17 no 15 mak sei implementa hela.
Alende ne’e, Implementasaun Projetu Reablitasaun Sede Suku (RSS) iha Postu administrativu Atabae, Balibo, Cailaco, Bobonaro no Loloto’e hamutuk unidade 43 atinje ona 95,93% konsege finaliza ona 35 no unidade ualu mak sei prosesu hela no suku hitu iha postu administrativu mak seidauk implementa.
“Maliana nia osan foin tama iha konta iha semana kotuk, ne’ebé tinan ne’e ita labele implementa, paresetinan oin mak ita sei implementa projetu ne’e,” nia garante.
Ikusliu projetu PNDS regular siklus (5) tinan 2023 seidauk konsege implementa tanba orsamentu foin tama iha novembru.
Notísia relevante:PNDS Bobonaro menus rekursu umanu kontrola projetu
Jornalista: Sergio da Cruz
Editór: Rafael Ximenes de A. Belo
