MALIANA, 13 jullu 2023 (TATOLI) – Diretór Programa Nasionál Dezenvolvimentu Suku (PNDS), munisípiu Bobonaro, Paulino Viegas Tilman, informa ekipa tekniku sira identfika kondisaun klima difikulta Uma Naroman ba Povu (UNP) faze daruak tinan fiskál 2022 hamutuk unidade 34 iha postu administrativu Bobonaro no Cailaco to’o agora seidauk hahú konstrusaun.
Nia konfirma dadus hatudu progresu fíziku UNP faze daruak iha munisípiu Bobonaro foin atinje 49%, hosi persentajen ne’e progresu di’akliu mak postu administrativu Maliana ne’ebé kuaze tama ona faze finalizasaun, falta de’it mak iha suku Suburai.
Maibé Diretór Paulino dehan, iha postu Bobonaro hanesan suku Colimau, Mali-Ubu, Leber, Molop no suku ida Iha Cailaco mak atraza liu, tanbA nia área implementasaun projetu iha liuliu remota nune’e bainhira akontese udan-bOot kondisaun estrada la permite fornesedór sira mibiliza materiál fabrikadu.
“Ita haree postu Bobonaro nia no Cailaco mak atraza, iha postu Bobonaro sei iha uma 34 mak seidauk komesa, tanba estrada ladi’ak, nune’e mos Cailaco iha suku Meligo, iha foho leten ne’ebá uma rua tenke halo iha leten, agora seidauk komesa hamutuk unidade 36 Casas mak seidauk hahú konstrui,” nia informa ba jornalista sira iha Maliana, kinta ne’e.
Nia parte orienta ona ekipa sira ne’ebé destakadu iha postu no Ekipa Jestaun Suku (EJP) atu halo observasaun iha terrenu, bainhira iha tempu bailoron.
“Sira organiza, haree biban iha ona atu lori kedas materiál ba, ita lori kedas ba ona konstrusaun uma ne’e, atubele aselera konstrusaun,” nia katak.
Jornalista: Sergio da Cruz
Editór: Evaristo Soares Martins
