Reprezentante povu iha PN kontinua husu MS solusiona aimoruk “stock out”
DILI, 05 janeiru 2024 (TATOLI)—Reprezentante povu iha uma fukun Parlamentu Nasionál (PN) liuhosi Deputada bankada PD kontinua husu Ministériu Saúde (MS) atu rezolve probelma aimoruk stock out iha fasilidade saúde iha territóriu.
Notísia Relevante: PN aprova millaun $67-resin ba MS, FRETILIN husu rezolve aimoruk “stock out”
“Stock out aimoruk ne’e akontese fulan hira ona no ida-ne’e ita-nia problema realidade,” Reprezentante povu iha uma fukum PN ne’e hato’o preokupasaun ba jornalista sira iha PN.
Maibé, Deputada membru komisaun F trata asuntu Saúde iha PN ne’e dehan, bainhira bolu Ministéiru Saúde no halo mós fiskalizasaun ne’e realidade. Hafoin iha aprezentasaun Orsamentu Jerál Estadu (OJE) 2024 halo audiénsia ho MS haree programa sira-ne’e prevee ona orsamentu kona-ba atu sosa aimoruk nune’e bele rekupera fila-fali stock out ne’ebé iha.
“Tanba ita foin semana ida aprova orsamentu, parese prosesu aprovizionamentu sosa iha rai-li’ur hanesan Índia, Indonézia, entaun tuir prosesu ne’ebé iha mak foin aimoruk bele tama iha ita-nia rai,” nia hateten.
Nia fiar katak, kompañia sira-ne’ebé atu hatama aimoruk tenke tuir rekezitu no regra ne’ebé iha hodi ita hatama sasán hanesan aimoruk ho kualidade tuir duni saida mak ospitál iha Timor-Leste presiza.
Iha parte seluk, Deputada hosi bankada Governu ne’e mós preokupa rekursu umanu ba pesoál saúde sira iha fasilidade saúde sira atu atende pasiente sira.
“Kona-ba ida-ne’e probelma hotu, maibé ami tau ona ba konsiderasaun. Iha balun loke ona vaga no ema aplika ona, ita hein teste oinsá bele prienxe ita-nia rekursu umanu ne’ebé mamuk hanesan akontese dadaun ne’e,” nia dehan.
Antes ne’e, Deputadu bankada opozisaun FRETILIN, António Calau, husu ba MS atu tau atensaun ba problema aimoruk stock out iha fasilidade saúde sira, tanba ida-ne’e prezúdika tebes povu ne’ebé moras atu ba halo tratamentu sira-nia saúde.
Notísia Relevante: Aimoruk kontentór ida tama ona TL hatán ba ‘’stock out’’
Jornalista : Nelson de Sousa
Editór : Cancio Ximenes
