iklan

BOBONARO, HEADLINE, MUNISÍPIU, SAÚDE

Postu Saúde haat iha Bobonaro taka provizóriu

Postu Saúde haat iha Bobonaro taka provizóriu

Diretór Servisu Saúde Munisípiu Bobonaro, João Barreto Cardoso. Imajen Tatoli/Sérgio da Cruz.

BOBONARO, 08 janeiru 2024 (TATOLI)-Postu Saúde haat iha munisípiu Bobonaro, hahú semana dahuluk fulan ne’e taka provizóriu ka la halo atendimentu saúde ba komunidade sira tanba enfrenta problema laiha rekursu umanu.

Diretór Servisu Munisispál Saúde Munisípiu Bobonaro, João Cardoso, informa, problema refere afeta hosi desizaun Ministériu Saúde ne’ebé hapara kontratu pesoál saúde sira-nia iha loron 31 fulan dezembru tinan 2023 liubá.

Notisia relevante: Ai-moruk atende kazu emerjénsia stoke out iha Bobonaro

“Infelizmente ita-nia postu saúde lubun ida mak balun ema menus de’it, maibë balun laiha liu kedas, identifikadu tolu ka haat mak tanke taka, nia labele fó atendimentu loron-loron tanba ema-ne’ebé mak dezignadu servisu iha ne’ebá, agora daudaun para tanba maioria kontratradu,” nia ko’alia Soso, Maliana, segunda ne’e.

Postu saúde hirak-ne’ebé identfikadu taka hela mak hanesan postu saúde Atudara, Daudu, Lugululi no Lour.

Nia akresenta, problema ne’e afeta ba prestasaun servisu kada loron iha postu no sentru saúde sira, tanba funsionáriu públiku limitadu, nune’e labele kobre hotu servisu iha edifísiu no terrenu.

“Ezemplu iha sentru saúde Maliana ema na’in-25, agora kuaze 15 para tiha, entaun afeta ba servisu loron-loron. Iha fatin balu ita loke kada semana, pesoál saúde iha sentru saúde mak ba loke, iha fatin balun tanba limitadu pesoál saúde, entaun fulan ida mak ba loke dala ida, bainhira to’o tempu SISKA mak ba loke,” nia katak.

Nia konfirma pesoál saúde iha munisípiu Bobonaro ne’ebé termina kontratu iha tinan kotuk hamutuk na’in 120-resin.

Maibé tuir nia, daudaun ne’e Ministériu Saúde sei halo prosesu análize oinsá atu renova ka loke rekrutamentu foun ba pesoál saúde sira atubele operasionaliza fasilidade sira hodi presta atendimentu saúde ba pasiente sira iha área rurál.

“Ita sei hein desizaun hosi nível altu, entaun durante tempu ida-ne’e, ita sei menus tebes atu fó atendimentu ba ita-boot sira, entaun karik kualidade atandimentu ne’ebé ita-boot sira simu menus ka fraku oituan karik, favor ita-boot sira bele kompriende ho situasaun ida-ne’e, fulan rua nia laran Ministériu Saúde bele rezolve,” nia hateten.

Komunidade postu Bobonaro, Aniceto Lopez, husu ba Ministeriu Saúde atu aselera prosesu rekrutamentu ba pesoál saúde sira.

“Governu tenke tau-matan lalais, tanba agora tempu udan, ema moras barak, ema balu atu partu, sé ospitál sira taka hanesan ne’e,” nia preokupa.

Tuir informasaun ne’ebé Jornalista Agência Tatoli rekolla iha terrenu, maske governu hapara kontratu, maibé pesoál saúde balu voluntária skontinua apoia servisu iha fasilidade saúde hodi hein desizaun hosi Ministériu Saúde.

Notísi relevante: Profisionál Saúde 2.256 kontratu konklui no MS foin rekruta no sei simu 229 

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!