DILI, 08 janeiru 2024 (TATOLI)—Diretór Nasionál Asisténsia Sosiál (DNAS) iha Ministériu Solidariedade Sosial no Inkluzaun (MSSI), Fernando dos Reis, hateten programa Bolsa da Mãe Jersaun Foun ramata ona iha 31 dezembru 2023 ho totál benefisiáriu aprovadu hamutuk 61.349.
Notísia Relevante: Kaleidoskópiu 2023: Revoga “Bolsa da Mãe Jerasaun Foun”, mantein “Bolsa da Mãe Kondisionál”
“Ita-nia ajénsia T-Pay ho Mosan halo pagamentu ba bolsa da mãe jerasaun foun ne’e termina ona pagamentu ba ita-nia benefisiáriu sira iha 31 dezembru 2023 no sistema taka ona. Naran ne’ebé tama iha sistema to’o iha 12 novembru. Ita hatene katak bolsa da mãe jerasaun foun ne’e polítika VIII Governu Konstitusionál nian, depois implementa ona tinan rua no ita konsege halo prosesu pagamentu ba benefisiáriu no iha IX Governu Konstitusionál labele kontinua,” nia dehan ba Agência Tatoli, iha nia kna’ar fatin MSSI Caicoli, segunda ne’e.
Nune’, nia dehan, iha IX Governu Konstitusionál ida-ne’e la atribui tan ona programa ida-ne’e no ho razaun estudu viabilidade katak prosesu ne’e ladún kondisiona, entaun polítika Governu ida-ne’e nian deside taka.
Maibé, nia hateten, ninia natureza nafatin ba iha programa bolsa da mãe kondisionál no iha elementu ruma mak sei iha mudansa.
Entretantu, benefisiáriu Bolsa da Mãe Jerasaun Foun iha Covalima, Melinda de Jesus Ferreira, rekomenda ba IX Governu Konstitusionál atu kontinua implementa programa Bolsa da Mãe Jerasaun Foun iha Timor-Leste.
“Governu implementa programa bolsa da mãe jerasaun foun ne’e hodi bele hadi’a nutrisaun ba labarik sira, bazeia ba kondisaun labarik sira-nian. Maske fó osan ne’ebé kiik, lá’os hadi’a ona nutrisaun ho 100% maibé Governu bele fasilita ona ami inan isin-rua no labarik sira. Nune’e, ami hakarak Governu kontinua implementa programa bolsa da mãe jerasaun foun hodi bele hadi’a labarik sira-nia nutrisaun no bele hadi’a ami-nia moris,” nia dehan.
Dadus aprovadu hosi totál dadus rejistadu 61.349, hosi númeru benefisiáriu 50.633 ne’ebé kompostu inan isin-rua hamutuk 3.199, labarik ho idade 0-06 hamutuk 47.266 no labarik ho defisiénsia hamutuk 168, hosi totál aplikante hamutuk 10.716 ne’e la konsege simu sira-nia direitu ho razaun tanba dokumentu la kompletu.
Dadus benefisiáriu aprovadu kada fulan hosi munisípiu Ainaro hamutuk 5.825, Bobonaro iha 7.842, Covalima hamutuk 5.887, Liquiça iha 6.256, Manatuto hamutuk 3.808, RAEOA iha 6.671 no Viqueque hamutuk ema na’in-4.395.
Tuir dadus, totál pagamentu ba subsídiu bolsa da mãe jerasaun foun hahú hosi tinan 2022-2023 ne’e hamutuk $10.805.495.
Pagamentu iha tinan 2022 ne’e ho totál aplikante 22.328 ho nia osan $541,545 iha munisípiu Ainaro, Bobonaro no RAEOA.
Nune’e, montante $8.450,020,00 ba konta agensia T- pay no Mosan (iha janeiru-outubru) tinan 2023 no depois ba fulan-novembru no dezembru 2023 ne’e, ho montante hamutuk $2,028.910.
Notísia Relevante: Governu revoga programa bolsa da mãe jerasaun foun
Jornalista : Osória Marques
Editór : Cancio Ximenes
