DILI, 10 janeiru 2024 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu rezolusaun Governu ne’ebé aprezenta hosi Ministru Interiór, Francisco da Costa Guterres, kona-ba Planu Asaun Nasionál tinan 2024-2028 ba implementasaun rezolusaun 1325 Konsellu Seguransa Nasaun Unida ba feto, pás no seguransa.
“Rezolusaun 1325, ne’ebé aprova hosi Konsellu Seguransa Nasaun Unida iha loron 31 outubru 2000, ne’ebé ko’alia liu importánsia hodi promove igualdade jéneru iha faze hotu prosesu konstrusaun pás no seguransa, no rekoñese impaktu espesífiku hosi funu kontemporánea sira ba feto no labarik feto sira-nia moris,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu, kuarta ne’e.
Notísia relevante : Planu Asaun Nasionál ba Juventude aprovadu iha Konsellu Ministru
Planu Asaun Nasionál 1325 define objetivu no asaun sira ne’ebé sei hala’o iha ámbitu pilár prinsipál haat hanesan partisipasaun, prevensaun, protesaun no konstrusaun pás, ho objetivu atu reforsa papél feto iha manutensaun pás no konstrusaun Estadu.
Planu ida-ne’e, lidera hosi Ministériu Interiór, konta ho kolaborasaun hosi ministériu oin-oin, ne’ebé inklui solidariedade sosiál no inkluzaun, justisa, defeza, no Sekretaria Estadu Igualdade no Inkluzaun.
Enkuantu planu ne’e elabora liuhosi prosesu konsultivu no inkluzivu ida ne’ebé inklui mós parseiru dezenvolvimentu, organizasaun sosiedade sivíl, nune’e mós reprezentante hosi grupu vulnerável sira hanesan feto iha área rurál, ema ho defisiénsia, sobrevivente hosi konflitu no komunidade LGBTIQ+.
Jornalista : Antónia Gusmão
Editora : Julia Chatarina
