Volume mota hosi Indonézia kontinua sobu ponte Nunura
BOBONARO, 10 janeiru 2023 (TATOLI)-Hafoin akontese udan ho intensidade boot iha tersa (09/01) ne’e, rezulta volume bee hosi mota baliza entre Timor-Leste no Indonézia kontinua fó ameasa ba estrutura Ponte Nunura, iha parte aldeia Manu-Aman, suku Tapo-Memo ne’ebé ligasaun hosi postu administrativu Maliana ba munisípiu Liquiçá no kapitál Dili.
Komandante Operasaun Autoridade Protésaun Sivíl (APC sigla, portugés) Munisípiu Bobonaro, Inspetór Polísia José Lelo Bere, observa ponte refere kontinua hetan ameasa hosi mota tanba laiha barrajen ruma atu sátan volume bee ne’ebé sulin hosi parte Indonézia nian.
Notísia relevante: PN husu Governu halo intervensaun lalais ba ponte Nunura-Loes
“Ponte Nunura ne’e sai ameasa boot, orisida kalan ka aban ba oin mak udan, entaun ponte ne’e bele kotu, ne’ebé husu ba Obra Públika no Institutu Jestaun Ekipamentu Apoia Dezenvolvimentu Infraestrutura (IGEADI, sigla portugés) atu normaliza mota ne’e, nune’e bele tún iha parte klaran, tanba ita-nia mota ne’e baliza ho Indonézia, agora ema-nian hada tiha tembok penahan aas tebes, entaun mota suli mai fali área ita-nian,” nia ko’alia iha Maliana, tersa ne’e.
Ba kestaun ne’e, Sekretáriu Autóridade Munisípiu Bobonaro, João do Carmo de Fátima, konfirma hafoin ponte ne’e hetan ameasadu iha tinan hirak ba kotuk autoridade munisípiu Bobonaro hato’o ona pedidu ba Ministériu Obra Públika no parte kompetente atu halo intervensaun imediata.
“Ponte ne’e hetan observasaun teknikamente ekipa Obra Públiku, liuliu Diresaun Ponte no Estrada Nasionál, ita nia Ministru Obras Públika sesante iha VIII Governu, Salvador Pires no Abel Pires, mai observa direita ponte ne’e, tékniku sira halo ona levantamentu dadus atu halo reabilitasaun, maibé seidauk implementa,” nia katak.
Autoridade Munisípiu Bobonaro liuhosi Servisu Munisipál Obras Públika, durante ne’e labele halo intervensaun direita ba kondisaun Ponte refere, tanba ne’e kabe ba kompetensia nasionál.
“Ami kontinua halo koordenasaun ho parte Obra Públika atubele halo reabilitasaun ba ponte Nunura nia-ain ne’ebé mak hetan ameasadu hosi mota,” nia katak.
Enkuantu daudaun ne’e movimentasaun transporte públiku no privada diresaun hosi postu administrativu Maliana ba Kapitál Dili sei normál hanesan bainbain.
Tuir dadaus ne’ebé ekipa Servisu Munisipál Obras Públika identifika iha tinan kotuk, barrajen ne’ebé governu anteriór instala iha tinan hirak liubá iha áreadór ponte to’o lina fronteira Indonéziaa kuaze metru 800 mak hetan estragu.
Tuir observasaun ne’ebé Agência Tatoli iha terrenu nota katak, barrajen ne’ebé governu anteriór konstrui atu proteje ponte ne’e mos mota lori lakon hotu hodi rezulta rai natar agrikultór nia mós hetan ameasadu.
Notísia relevante: Komunidade ezije MOP proteje lalais estrutura ponte Nunura
Jornalista: Sérgio da Cruz
Editór: Evaristo Soares Martins
