DILI, 11 janeiru 2024 (TATOLI)—Primeiru-Ministru (PM), Kay Rala Xanana Gusmão, akompaña ho membru Governu balun hala’o enkontru ho Ministru Floresta Koreia Súl, NAM Sung Hyun, hodi diskute kooperasaun iha área refloresaun, ne’ebé atu kuda ai-horis hamatak foho lolon no rai mamuk sira iha Timor-Leste.
“Ministru floresta hosi Koreia Súl, ita sente kontente bele mai Timor-Leste, sira iha esperiénsia boot kuda ai, hahú tinan 50 ba kotuk to’o agora. Ne’e duni sira haree ba Timor-Leste, sira hakarak ajuda atu ita-nia rai labele maran demais hanesan baibain ita haree daudaun. Ne’ebé enkontru ne’e di’ak tebes, sira sei fó apoiu barak kuda ai atu hamatak ita-nia rain,” PM Xanana hateten hafoin enkontru, iha Gabinete Fronteira Marrítima no Terrestre, Palásiu Governu, kinta ne’e.
Ho apoia ne’e, Ministériu Agrikultura, Pekuária, Peska no Floresta (MAPPF) sei halo planu didi’ak foin bele ezekuta programa iha tinan 2025 ba oin.
“Ministru dehan, KOICA sei fó apoia, ita sei halo planu didi’ak to’o iha 2025, ne’ebé fó tempu ba Sekretaria Estadu Floresta no Ministériu Agrikultura no Peska atu halo planu, tanba Koreia hakarak fó apoia ida-ne’e,” Xefe Governu akresenta.
Notísia relevante : Floresta Covalima prepara ai-kameli 1.500 hodi distribui ba agrikultór sira
Iha fatin hanesan, Ministru Floresta Koreia Súl, NAM Sung Hyun, promote sei haruka uluk péritu kona-ba reflorestasaun hala’o uluk peskiza rai iha Timor-Leste nian hodi bele hatene rai ne’ebé di’ak no serve atu kuda ai, nune’e bele moris hodi hamatak foho lolon sira.
“Agradese tebes, ami bele partilla hanoin ba malu, liu-liu esperiénsia Koreia Súl kona-ba área reflorestasaun ninian, ne’ebé iha esperiénsia tinan 50 liu oinsá ami prezerva foho sai matak no kuda ai ne’ebé di’ak iha rai hodi sai matak. Tanba ne’e, ami hakarak koopera hodi oinsá bele ajuda Timor-Leste hamatak faho sira,” Ministru NAM Sung Hyun dehan.
Governu Timor-Leste mós agradese ba apoia hosi Governu no setór privadu Koreia Súl ne’ebé fó oportunidade ba timor-oan sira bá serbisu hodi aumenta esperiénsia.
Enkontru ne’e akompaña hosi Ministru Agrikultura, Pekuária, Peska no Floresta, Marcos da Cruz, Sekretáriu Estadu Floresta, Fernandino Viera da Costa, inklui Embaixadór Koreia Súl iha Timor-Leste, Shin Man Taek.
Jornalista : Antónia Gusmão
Editora : Julia Chatarina
