DILI, 15 janeiru 2024 (TATOLI)—Ministru Obra Públika, Samuel Marçal, hateten, konstrusaun estada ligasaun postu Aileu Vila to’o Lequidoe liu ba Remexio daudaun ne’e paradu provizóriu.
“Konstrusaun estrada Lequidoe daudaun ne’e seidauk la’o tanba problema oituan iha dezeñu. Dezeñu la halo estudu didi’ak, estrada loke luan liu, komunidade barak ne’ebé hela besik sai afetadu hotu no daudaun seidauk selu indemnizasaun,” Ministru informa iha Palásiu Governu, segunda ne’e.
Governante ne’e bolu ona tékniku sira atu tuur hamutuk hodi haree filafali tanba estrada ne’e la’ós dalan nasionál, tanba ne’e presiza haree estrada ne’ebé mak presiza alarga.
“Bele akontese re-dezeñu hosi dezeñu anteriór no nia orsamentu ita bele mantein maibé ba re-dezeñu bele aumenta ninia naruk,” nia akresenta.
Notísia relevante : Estrada ligasaun Aileu-vila ba Lequidoe no Remexio hatuur ona fatuk dahuluk
Antes ne’e, VIII Governu hatuur ona fatuk dahuluk projetu estrada ligasaun Aileu Vila bá Lequidoe no Remexio, iha loron 27 juñu 2023.
Projetu ne’e toma konta hosi empreza internasionál China Overseas Engineering Group Co. Ltd (COVEC) ho kustu projetu $24.235.453,31 no tuir planu durasaun kontratu fulan-18.
Estrada ne’e ho naruk kilómeteu 27-resin, ne’ebé tama iha verba orsamentu fundu infraestrutura.
Jornalista : Arminda Fonseca
Editora : Julia Chatarina
