iklan

HEADLINE, MUNISÍPIU, OÉ-CUSSE (RAEOA), SAÚDE

CFP observa Servisu Saúde Oé-Cusse laiha problema kona-bá rekursu umanu

CFP observa Servisu Saúde Oé-Cusse laiha problema kona-bá rekursu umanu

Komisaun Funsaun Públika hala'o enkontru ho dirijente sira Iha servisu saúde Oe-Cusse. Imajen espesiál.

 

OÉ-CUSSE, 17 janeiru 2024 (TATOLI) – Prezidente Komisaun Funsaun Públika (CFP, sigla portugés), Agostinho Letêncio de Deus, akompaña ho Komisáriu Asuntu Fosa Traballu, kuarta ne’e hala’o observasaun no enkontru ofisiál ho dirijente sira iha Sekretáriu Rejionál ba Asuntu Saúde Rejiaun Administrativa Espesiál Oé-Cusse Ambeno (RAEOA).

Iha vizita ne’e, Prezidente Komisaun Funsaun Públika, Agostinho Letêncio de Deus, agradese ba dirijente sira iha servisu saúde Oé-Cusse, tanba konsege jere rekursu umanu sira koloka ba fasilidade saúde hodi fó atendimentu públiku.

“Iha vizita ba saúde, ha’u bele halo komparasaun ida, bele sai mós referénsia ba munisipíu sira seluk, loos duni, sira rekoñese katak, ajente lubun tenke para kontratu tanba orientasaun, maibé relatóriu ne’ebé sira halo maka, sira tenta atu jere sira-nia rekursu balu, ezemplu, enfermeiru balu, sira jere didi’ak, bele atende fali servisu seluk, durante ne’e ajente sira hala’o hela servisu iha fatin ne’e,” Agostinho Letêncio de Deus, ba jornalista sira iha Oé-Cusse.

Notísia relevante: KFP hahú buka hatene problema profesór kontratadu sira iha Oé-Cusse

Tuir nia, servisu saúde iha RAEOA laiha problema liga ho rekursu umanu tanba servisu kontinua la’o di’ak.

Nia informa, tuir relatóriu ne’ebé funsaun públika simu, servisu la’o tanba dirijente sira konsege jere rekursu umanu ne’ebé iha ospitál referál, tanba iha ospitál hotu-hotu, alende ajente iha mós funsionáriu permanente.

Entaun depende tebes ba jestór no administradór sira iha ospitál sira konsege fahe enfermeiru, parteira no médiku sira halo servisu rotasaun, atu responde fali ba fasilidade saúde ne’ebé mamuk.

“Ida-ne’e jestaun ida-ne’ebé di’ak, ita tenke asegura duni jestaun ida-ne’e, hanesan funsionáriu públiku, ita tenke prontu ba kualkér mudansa no orientasaun atu garantia atendimentu públiku, entaun hosi esperiénsia iha Oé-Cusse ne’e, ita espera katak munisipíu sira seluk inklui nasionál bele foti hanesan referénsia hosi Oé-Cusse atu hala’o atendimentu ba moras sira,” nia afirma.

Notísia relevante:Estoke ai-moruk iha armazein Hospital Referénsia Oé-Cusse sufisiente

Entretantu, antes ne’e,  Diretóra Servisu Saúde Oé-Cusse, Lolita Dos Santos, fó sai, profisionál saúde hamutuk na’in-91 kontinua presta servisu ho voluntária hodi hein kontratu foun hosi Ministériu Saúde (MS) tanba kontratu remata ona iha loorn 31 dezembru 2023.

No mós iha na’in-44 servisu iha saúde família termina ona kontratu tanba antes ne’e Ministériu Saúde rekruta ho orsamentu fundu COVID-19.

Diretora ne’e, rekoñese sentru saúde no postu saúde sira iha terrtóriu Oé-Cusse, enfrenta problema menus rekursu umanu.

Maibé polítika ne’ebé servisu saúde Oé-Cusse halo, hodi aloka funsionáriu permanente balu hodi taka provizória kontratadu sira-nia fatin hodi kontinua fó atendimentu ba komunidade sira.

“Ita-nia postu saúde sira laiha problema atu taka, iha menus profisionál, balu ida de’it balu na’in-rua, maibé ita koloka permanente sira balu ba haforsa-tán atu taka kontratadu sira-nia fatin, nune’e servisu saúde labele abandona,” nia informa.

Notísia relevante: Profisonál saúde 91 iha Oé-Cusse serbisu voluntária, 44 termina kontratu

Jornalista: Abílio Elo Nini

Editór: Evaristo Soares Martins      

iklan
iklan

Leave a Reply

iklan
error: Content is protected !!