VIQUEQUE, 17 janeiru 2024 (TATOLI)—Eskola Ensinu Báziku Sentrál (EBC) 09 Haenaudere, ne’ebé lokaliza iha área rurál, postu administrativu Uatulari, munisípiu Viqueque, daudaun ne’e enfrenta menus profesór hanorin matéria haat tanba profesór sira-nia kontratu ramata iha loron 31 dezembru 2023.
“Eskola ida-ne’e menus liu profesór lori matéria siénsia matématika, siénsia naturál, istória jeografia no siénsia fízika. Durante ne’e profesór kontratadu ne’ebé kontratu hotu ona ne’e maka lori, maibé agora sira laiha, profesór ba área haat ne’e laiha, tanba ne’e hanesan desizaun Ministériu Edukasaun ami labele halo buat ruma,” Diretór Eskola EBC 09 Haenaudere, Aquilis Martins, hateten ba Agência Tatoli, iha postu administrativu Uatulari, kuarta ne’e.
Nia konsidera, materiál haat ne’e hanesan siénsia eksata, nune’e presiza profesór ba área espesífiku maka bele lori materiál haat ne’e.
“Prosesu aula prezensiál daudaun ne’e la’o ona, maibé ba matéria haat ne’e profesór laiha. Se profesór kontratadu sira-ne’e maka kontratu extende karik ami bele koloka ba matéria hodi hanorin ita-nia estudante sira, maibé ne’e desizaun ministériu,” nia akresenta.
Notísia relevante : Eskola EBF Osokaiua Uatulari menus profesór
Nune’e, nia husu Governu konsidera profesór kontratadu sira atu asegura funsionamentu eskola, se la’e estudante sira sai vítima.
“Ami husu ba ministériu kompetente atu tau atensaun ba problema menus profesór. Tanba estudante sira mai eskola maka profesór hanorin laiha, inan aman sira bele mai protesta ami. Profesór laiha ne’e ministériu tenke tau atensaun tanba edukasaun sai nu’udar futuru ba nasaun. Ami prefere rezolve lalais hodi labele difikulta prosesu hanorin,” nia hato’o.
Eskola EBC Haenaudere ho ninia filiál tolu inklui sentru ida iha profesór kontratadu hamutuk na’in-11, nune’e eskola haat presiza profesór.
“Ami-nia eskola ne’e iha ninia filiál tolu, ne’ebé profesór kontratadu hamutuk 11 maka sira-nia kontratu ramata, nune’e daudaun filiál sira menus profesór. Karik kontratadu sira-ne’e maka kontratu la hotu karik ami sente di’ak, maibé agora kontratu hotu sai dezafiu ida ba ami hodi koloka profesór ba filiál sira,” nia tenik.
Tuir dadus, Eskola EBC 09 Haenaudere iha estudante hamutuk na’in-416, kompostu hosi pré-eskolár, klase 1 to’o 9 ano iha profesór permanente na’in-10. Enkuantu filiál tolu kompostu hosi EBF Nululi ho totál estudante na’in-216 no profesór permanete na’in-neen, EBF Osokaiua profesór na’in-ida, estudante 33 no EBF Uaibira totál estudante na’in-100 kompostu hosi klase 1 to’o 7 ano no profesór permanente na’in-haat.
Jornalista : Vitorino Lopes da Costa
Editora : Julia Chatarina
