DILI, 17 janeiru 2024 (TATOLI)—Ministru Prezidénsia Konsellu Ministru, Agio Pereira, aprezenta projetu rezolusaun kona-ba estabelese remunerasaun Prezidente Komisaun Funsaun Públika (KFP), iha ámbitu reuniaun ordinária Konsellu Ministru (KM), ne’ebé diploma ne’e hetan ona aprovasaun.
Inisiativa ne’e tanba Governu konsidera katak nível responsabilidade podér no grau komplesidade inklui ezijénsia tarefa sira ne’ebé inerente ba kargu Prezidente KFP boot liu kompara ho membru seluk sira iha komisaun.
“Governu deside hodi aumenta remunerasaun Prezidente nian, muda ba eskalaun da-3, ne’ebé uluk ne’e aliña ho komisáriu sira seluk, iha eskalaun da-2,” Ministru Agio, hateten hafoin reuniaun ezekutivu, iha Palásiu Governu, kuarta ne’e.
Notísia relevante : Governu nomea Agostinho Letêncio de Deus sai Prezidente KFP
Aleinde ne’e, Governu mós haree katak KFP ne’ebé kria liuhosi lei númeru 7/2009, iha loron 15 jullu mak órgaun ne’ebé responsável atu garante funsaun públika, polítikamente izenta, imparsiál, bazeia ba méritu, ho padraun profisionalizmu ne’ebé a’as, ho objetivu atu presta serbisu ho kualidade ba Estadu no povu Timor-Leste.
Ho diploma ida-ne’e, pagamentu ba remunerasaun ekivalente ho eskalaun da-2 hosi remunerasaun ba titulár órgaun diresaun hosi pesoál koletiva públika sira ne’ebé integra iha administrasaun indireta Estadu no servisu personalizadu ne’ebé abranje iha ámbitu dekretu-lei númeru 92/2022, iha loron 22 dezembru, ne’ebé korresponde valór 80% hosi remunerasaun Primeiru-Ministru nian, ne’ebé sei selu hosi inísiu funsaun Prezidente KFP nian.
Jornalista : Antónia Gusmão
Editora : Julia Chatarina
