DILI, 15 novembru 2023 (TATOLI)–Governu liuhosi reuniaun Konsellu Ministru (KM), kuarta ne’e, nimea Agostinho Letêncio de Deus nu’udar Prezidente Komisaun Funsaun Públika (CFP, sigla portugés) ba mandatu tinan lima mai.
Tuir nota ne’ebé Agência Tatoli asesu haktuir, liuhosi reniaun Konsellu Ministru ne’e mós Governu aprova rezolusaun ne’ebé aprezenta hosi Primeiru-Ministru, Kay Rala Xanana Gusmão, nomea mós komisáriu Komisaun Funsaun Públika (KFP), José Telo Soares Cristovão no Maria Domingas Alves atu ezerse sira-nia mandatu ba tinan lima ho rejime dedikasaun eskluzivu.
Antes ne’e, liuhosi despaixu Númeru 12/PM/11/2023, Governu ezonera Prezidente Komisaun Funsaun Públika, Faustino Cardoso Gomes, no Komisáriu Komisaun Funsaun Públika na’in-rua mak Komisária Maria de Jesús Sarmento no Carmeneza dos Santos Monteiro.
Nune’e mós, antes ne’e, Prezidente Komisaun Funsaun Públika, Faustino Cardoso Gomes, lei fó dalan governante sira halo ezonerasaun ba kargu xefia siraiha institusaun públika.
Prezidente Komisaun Funsaun Públika (KFP) ne’e hatete, iha dekretu-lei númeru 25/2016 kona-ba Rejime Kargu Dirasaun Xefia fó dalan ba membru Governu sira halo ezonerasaun ba xefia maske mandatu ka kontratu seidauk ramata.
“Rejime kargu dirasaun xefia ne’e bazeia ba dekretu-lei númeru 25/2016 iha artigu 6 no artigu 15 regula kona-ba ezonerasaun sira. Kestaun ezonerasaun loos, to’o ohin loron, ita-nia titulár dirasaun kargu xefia sira laiha ida maiória hosi nomeasaun em substituisaun, nomeasaun temporária ne’ebé tuir lei ba fulan-neen bele extende tan ba fulan neen. Maibé, sira-ne’ebé uluk asume ne’e balun tinan ba tinan no tempu naruk tiha ona, ne’ebé satán aumenta tan mudansa governamentál tuir lei kabe ba sira atu deside, komisaun (KFP) simu,” Prezidente KFP ne’e hateten ba Agência Tatoli iha edifísiu KFP, Matadoru, kinta (21 setembru 2023) ne’e.
Nia dehan, KFP simu proposta no apresia katak se prienxe rekezitu hanesan grau mínimu, avaliasaun dezempeñu no prosesu dixiplinár ho buat seluk tan bainhira kompleta aprova no nomea.
Mezmu titulár dirasaun kargu xefia sira-nia kontratu ka mandatu prevista ramata iha 31 dezembru maibé seidauk to’o ne’eba, ministériu ka instituisaun hakrak halo proposta foun hodi nomea foun halo ezonerasaun ne’e lei fó dalan.
“Termu ne’e komisaun funsaun públika dehan to’o 31 dezembru mak ramata, maibé la taka dalan ba ministériu ka instituisaun ne’ebé mak hakarak fó proposta foun, depois halo ezonerasaun hodi halo nomeasaun foun, sira iha direitu no kompeténsia tomak no komisaun (KFP) prontu simu nafatin,” nia hateten.
Nia esplika, ida prevista to’o 31 dezembru tanba iha administrasaun públika labele mamuk tanba instituisaun balun hato’o no la to’o, labele hein to’o tempu ramata tenke hanoin kreativu entaun se hakarak halo mudansa komisaun simu nafatin proposta.
Aleinde ne’e, Konsellu Ministru mós aprova projetu Dekretu Governu ne’ebé aprezenta hosi Ministra Finansa, Santina José Rodrigues F. Viegas Cardoso, ba alterasaun daruak Dekretu Governu Númeru 19/2022, 11 Maiu, kona-ba klasifikadór orsamentál.
Diploma ida-ne’e altera ona hosi Dekretu Governu Númeru 11/2023, 25 outubru, maske nune’e, iha ámbitu prosesu preparasaun ba Proposta-Lei Orsamentu Jerál Estadu ba tinan 2024, identifika ona nesesidade atu halo alterasaun adisionál ba klasifikadór ekonómiku despeza nian atu aumenta detallu no transparénsia iha kontas públika.
Jornalista : Osória Marques
Editór : Cancio Ximenes
