DILI, 17 janeiru 2024 (TATOLI)—Ministru Obra Públika, Samuel Marçal, aprezenta projetu dekretu-lei iha ámbitu reuniaun ordinária Konsellu Ministru (KM), kuarta ne’e, hodi atribui subsídiu risku ba traballadór ne’ebé hala’o funsaun iha Institutu Jestaun Ekipamentus no Apoiu ba Dezenvolviementu Infraestrutura, Instututu Públiku (IGEADI, I.P).
“Subsídiu ida-ne’e hakarak atu kompensa kondisaun espesiál serbisu sira ne’ebé enfrenta hosi profisionál, ne’ebé sira-nia atividade envolve risku signifikativu, espozisaun kondisaun klimátika estrema, rai-rahun, barullu demaziadu no fatór seluk ne’ebé estraga ou ameasa saúde”, Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Notísia relevante : IGEADI, I.P simu pedidu intervensaun emerjénsia 40 ba infraestrutura iha fulan-jullu
Subsídiu risku ne’e fó de’it ba traballadór IGEADI ne’ebé envolve iha operasaun ho ekipamentu pezadu, liu-liu iha situasaun dezastre naturál hanesan inundasaun no rai-monu no ba de’it loron efetivu serbisu iha terrenu.
“Montante subsídiu ne’e oioin, tuir natureza serbisu no lokalizasaun jeográfika, no sei selu fulan-fulan hamutuk ho remunerasaun benefisiáriu nian,” Ministru akresenta.
Nune’e, benefisiáriu hosi subsídiu risku ne’e maka traballadór sira ne’ebé hala’o knaar iha IGEADI, la haree ba natureza vínkulu, inklui titulár kargu diresaun no xefia, ho funsaun operadór ba mákina boot sira, kondutór ba veíkulu boot ho tonelajen hanesan ka boot liu fali tonelada 30, motorista ba veíkulu boot menus hosi tonelada 30, mekániku, enjeñeiru operasionál no asistente operadór ba mákina boot
Jornalista : Antónia Gusmão
Editora : Julia Chatarina
