IGEADI, I.P simu pedidu intervensaun emerjénsia 40 ba infraestrutura iha fulan-jullu
DILI, 25 jullu 2023 (TATOLI)—Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P) simu ona pedidu intervensaun emerjénsia ba infraestrutura, kauza dezastre naturál ne’ebé akontese iha inísiu fulan-jullu iha territóriu laran.
“Ita simu pedidu emerjénsia hamutuk 40 resin ba infraestrutura hanesan ponte, estrada no mota, hafoin akontese udan-boot iha fulan-jullu nia laran,” Prezidente interinu IGEADI, I.P, Abrão Pereira, informa ba Agência Tatoli, iha ninia knaar fatin, Colmera, tersa ne’e.
Hosi pedidu sira ne’e, daudaun ekipa IGEADI, I.P liuhosi ninia Brigada destakadu sira iha munisípiu konsege normaliza ona balun.
“Maski to’o oras ne’e komunidade sei iha preokupasaun kona-ba dalan, ita husu pasiénsia oituan tanba ita-nia ekipamentu limitadu, entaun pedidu ne’ebé tama ne’e emerjénsia hotu maibé ita haree ida ne’ebé mak emerjénsia liu,” nia akresenta.
Notísia relevante : IGEADI, I.P sei hetan mákina pezadu unidade 26 hosi Governu Japaun
Nia dehan, bainhira Brigada sira sente estragu infraestrutura boot no la konsege rezolve ona maka sei entrega ba Ministériu Obra Públika (MOP) hodi haree.
Pedidu emerjénsia 40 ne’ebé institutu simu no normaliza ona mak hanesan estrada boot Hola-rua, Alas postu administrativu Same, munisípiu Manufahi, Zumalai Zulo hosi Aitutu to’o Manu-tasi Casa Jakarta II, Manatuto parte Laclubar, Viqueque Uma tolu, no Maliana Lolotoe, Uma tolu Lacluta ba Dilor iha Viqueque no seluk tan.
Ekipa sei kontinua normaliza infraestrutura ne’ebé seidauk hanesan iha Lautém ponte kotu, Covalima Suai ponte kotu, Zumalai Zolu bee mean, no seluk tan.
“Ami prontu nafatin hein pedidu emerjésnia sira hosi komunidade tanba ita-nia Brigada sira prontu hela iha terrenu, maski fatin balun seidauk normaliza tanba ita menus ekipamentu pezadu, entaun halo neineik,” nia tenik.
Jornalista : Arminda Fonseca
Editora : Julia Chatarina
