iklan

COVALIMA, HEADLINE

PNTL Covalima garante seguransa ba komunidade livre halo movimentasaun

PNTL Covalima garante seguransa ba komunidade livre halo movimentasaun

Komandante PNTL Covalima, Superintendente Polísia Calisto Gonzaga. Imajen Tatoli/Celestina Teles.

COVALIMA, 17 janeiru 2024 (TATOLI) – Komandu Polísia Nasionál Timor-Leste (PNTL) Covalima iha papél importante lima atu garante seguransa ba komunidade hodi livre halo movimentasaun mak halo patrullamentu, mantein orden públika, deteta situasaun sedu, asegura via públika no uza forsa represiva halo kapturasaun hodi loke prosesu tuir lei.

Komandante PNTL Covalima, Superintendente Polísia Calisto Gonzaga, hatete iha tinan ida ne’e PNTL hala’o nia funsaun mak garante seguransa ba komunidade, liuhusi patrullamentu hodi fahe informasaun iha eskola hodi fó seguransa iha fatin hotu, preve krime ne’ebé tenta atu mosu, tenke hala’o enkontru ho komunidade hodi hato’o informasaun kona-ba prevensaun krime no tenke aproxima buat ne’ebé mak seidauk akontese.

Aleinde ne’e garante seguransa ba atividade adisionál ne’ebé Governu hala’o iha Covalima, maske falta rekursu, maibé komandu nafatin halo jestaun ho rekursu ne’ebé iha.

PNTL Covalima iha membru hamutuk 148 ne’ebé balun destaka ba iha eskuadra hitu no seluk iha komandu PNTL Covalima.

Tuir konstituisaun RDTL, iha artigu 147 hatete polísia no forsa seguransa sira sei defende legalidade demokrátiku no garante sidadaun sira-nian seguransa internu, maibé sira labele iha partidu polítiku, no ba prevensaun kriminál tenke hala’o ho respeitu ba direitu umanu no lei maka sei harii rejime ba polísia no mós forsa seguransa seluk.

Sidadaun Albano Amaral hateten nia parte apoia funsaun polísia nian tanba komandu hakarak halo patrullamentu ho rigór atu evita akontese krime ruma no halo prevensaun.

“Polísia bele hala’o patrullamentu ho másimu, nune’e molok akontese krime sira halo ona prevensaun. Funsaun polísia nian mak atu garante seguransa, nune’e komunidade sira bele halo movimentu ho livre no agora iha Covalima bele la’o ho livre”, realsa.

Notísia relevante: PNTL Covalima hakarak kompleta estabelesimentu membru KPK iha tinan ne’e

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!