COVALIMA, 12 janeiru 2024 (TATOLI) – Komando Polísia Nasionál Timor-Leste (PNTL) Covalima sei kompleta estrutura Konsellu Polisiamentu Komunitáriu (KPK) iha suku 14.
“Tinan ida-ne’e ita atu kompleta estabelesimentu membru Konsellu Polisiamentu Komunitáriu (KPK) foun ne’ebé seidauk estabelese iha suku 14. Ita tenke fó pose ba sira”, Komandante PNTL Covalima, Superintendente Polísia, Calisto Gonzaga, hatete iha Santa Rosa, ohin.
Komandante ne’e dehan atu kompleta estrutura KPK iha suku ne’ebé foin lalais hala’o eleisaun presiza halo konfirmasaun ho nasionál, nune’e bele fó pose ba membru KPK ne’ebé seidauk estabelese iha Covalima.
Tanba ne’e, komandu hahú rejista ona ba sidadaun ne’ebé atu sai membru KPK iha suku sira ne’ebé maka seidauk iha.
Hafoin estabelese membru KPK, sei fó mós formasaun ba membru sira, nune’e bele fasilita serbisu iha suku no aldeia liga ho serbisu polísia.
Covalima iha nia postu administrativu sira mak Fatululik, Fatumea, Fohorem, Tilomar,Maucatar, Suai no Zumalai ho nia suku 30 no aldeia 148.
Membru PNTL ne’ebé servisu iha komandu PNTL Covalima hamutuk 148 ne’ebé balun destaka bá iha eskuadra hitu no seluk iha Komando PNTL Covalima.
Notísia relevante: PNTL Covalima seidauk estabelese KPK iha suku 14
Jornalista : Celestina Teles
Editora : Maria Auxiliadora
