DILI, 17 janeiru 2024 (TATOLI)—Ministru Planeamentu no Investimentu Estratéjiku, Gastão Francisco de Sousa, aprezenta projetu dekretu-lei kona-ba regulamentu Fundu Dezenvolvimentu Kapitál Umanu (FDCH, sigla portugés) iha ámbitu reuniaun ordinária Konsellu Ministru (KM), kuarta ne’e.
“Dekretu-Lei ne’ebé hetan ona aprovasaun ne’e ho objetivu atu regulamenta Fundu Dezenvolvimentu Kapitál Umanu, ne’ebé kria hosi lei númeru 1/II/2011 loron14 fevereiru, ho finalidade atu finansia projetu formasaun rekursu umanu iha setór estratéjiku sira, tantu iha rai-laran no rai-li’ur,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Notísia relevante : Timoroan rihun 10-resin benefisia ona Programa Bolsa Estudu husi FDCH
Aleinde ne’e, objetivu seluk atu alkansa ho intervensaun lejizlativa ida-ne’e maka ba dahuluk hodi estabelese iha organizasaun administrasaun fundu, inklui ninia natureza jurídika, governasaun no regra funsionamentu, abordajen espesífika ne’ebé konkretiza objetivu polítika ne’ebé estabelese iha programa Governu no atribui hosi lei ba ninia responsabilidade.
“Ba daruak, hakarak atu dezeña estrutura organizasionál fundu ne’ebé orienta hosi padraun efisiénsia no efikásia atuasaun administrasaun nian, iha jestaun no implementasaun Planu Estratéjiku Dezenvolvimentu, ho objetivu atu hadi’a kualidade prestasaun bens no servisu públiku ne’ebé barak no di’ak liután ba sidadaun iha finansiamentu projetu no programa formasaun plurianuál ba rekursu umanu rai-laran iha setór estratéjiku ba dezenvolvimentu país ne’e nian, tantu iha Timor-Leste no mós iha estranjeiru,” nia tenik.
Jornalista : Antónia Gusmão
Editora : Julia Chatarina
