iklan

BAUCAU, HEADLINE, MUNISÍPIU, POLÍTIKA

Veneranda Lemos ofisialmente lidera Baucau

Veneranda Lemos ofisialmente lidera Baucau

Prezidente Autoridade Munisipál (PAM) Baucau, Veneranda Lemos, simu pose hosi Ministru Administrasaun Estatal, Tomás Rosario Cabral iha CCB, Vila Antiga Baucau, kinta (18/01). Imajen Agência TATOLI/Natalino Belo.

BAUCAU, 18 janeiru 2024 (TATOLI) – Veneranda Eurico Marques Lemos Martins, ofisialmente sai nu’udar Prezidente Autoridade Munisipál Baucau hafoin simu pose hosi Ministru Admistrasaun Estatal (MAE), Tomás do Rosário Cabral.

Ministru Admistrasaun Estatal, Tomás Rosário Cabral, esplika, hahú hosi PAM, Sekretáriu Munisipál no Diretór Serbisu Munisipál ne’ebé simu pose sei konsentra liu ba preparasaun implementasaun lei podér lokál no desentralizasaun administrativa nune’e prienxe kritéria atu sai Autoridade Munisipál Baucau liuhosi eleisaun munisipál hodi hili direita PAM no membru asembleia munisipál.

“2024, governu fó ona fundu kapitál dezenvolvementu, sé Baucau oan hotu hamutuk ho fundusñ ne’ebé iha no bens serbisu inklui delegasaun kompeténsia ne’ebé governu sentrál fó mai iha tempu badak Baucau sei sai munisipál ida,” Ministru Admistrasaun Estatal hateten iha Sentru Konvensaun Baucau (CCB, sigla portugés), kinta ne’e.

Munisípiu Baucau sai ona Autoridade Munisipál liuhosi dekretu-lei númeru 16/20216 kona-ba transferénsia podér lokál, maibé laiha fundu dezenvolvimentu nune’e governu atuál halo ona reforma ho kedas estrutura Sekretáriu Munisipál hamutuk tolu nune’e munisípiu hotu sai autoridade.

Prezidente Autoridade Munisipál (PAM) Baucau, Venderanda Lemos, espresa agradesementu no apresiasaun ba konfiansa hosi IX Governu relasiona ho asume kargu PAM hodi halo misaun iha rai-moris fatin munisípiu Baucau.

“Nu’udar Baucau oan, h’au simu konfiansa ida-ne’e ho onra no responsabilidade atubele kontribui ba prosesu dezenvolvimentu iha munisípiu Baucau,” Prezidente Autoridade Munisipál Baucau hateten.

Eis deputada PN ne’e kompromete sei esforsu atu harii aliserse hosi baze hodi prepara kondisaun ba prosesu desentralizasaun tuir programa, planu no polítika hosi IX Governu Konstituisionál nian, liuliu kolabora ho entidade hotu tantu sivíll, militár, lian-na’in, autoridade suku, konviksaun relijioza no veteranu nune’e hametin unidade, pás, estabilidade ne’ebé sai prinsipál hodi aselera desentralizasaun no podér lokál.

Alende ne’e, identifika problema iha munisípiu Baucau hanesan esforsu iha área importante sira fornesementu bee-moos ba komunidade, infraestrutura bázika ne’ebé ligadu direita ba povu hanesan ekonomia, sosiál, kultura no turismu.

“Ha’u sei la serbisu mesak, harii aliserse ida-ne’e metin. Dahuluk sei hakuak no envolve Baucau oan sira,” Venderanda Lemos argumenta.

Venderanda Lemos antes ne’e nu’udar deputada iha Parlamentu Nasionál (PN) hosi bankada partidu Congresso Nacional Reconstrução de Timorense (CNRT,) iha tinan-2017 to’o 2023 ne’ebé orijen hosi munisípiu Baucau, moris iha loron 23 maiu 1968.

Eis deputada ne’e hosi tinan-2012 to’o 2017 asume kargu Sekretária Estadu Asuntu Apoia Promosaun Setór Privadu iha governasaun dala-lima no kontinua asume iha governasaun dala-neen asume kargu nu’udar Sekretária Estadu Asuntu Apoia Promosaun Sosiu-ekonomia ba Feto.

Serimónia refere fó pose mos kargu kargu Sekretáriu Administrasaun Munisipál Baucau no Diretór Serbisu Munisipál sira bazea ba despaxu númeru 06/M-MAE/I/2024, ne’ebé Sekretáriu Adminstrasaun Munisipál Admistrasaun no Finansa asume hosi Juvinal Belo, Sekretáriu Munisipál Asuntu Planeamentu, Investimentu Dezenvolvimentu Munisipál Eduardo Belo no Sekretária Munisipál Asuntu Sosiál no Organizasaun Maria Viegas.

Nune’e mos kargu Diretór Serbisu Munisipál Ajénsia Fiskalizasaun Francisco Xavier, Ajénsia planeamentu João Piedade, Rekursu Umanu Florindo Perreira, Finansa no Administrasaun Ana Freitas, Diretór Planu Dezenvolvimentu Integradu Munisipál (PDIM) Carlos Guterres, Patrimóniu no lojístika Paulino Pinto no Diretór Organizasaun Naun Governamentál Ana Ximenes.

Diretór Serbisu Munisipál Edukasaun Baucau asume hosi Afonso da Costa, Serbisu Saúde lidera hosi Cristiano Belo, Obras Publika Agostinho Ximenes, Noberto da Costa nu’udar Diretór Serbisu Munisipál Água no Saneamentu, Agrikultura Baucau Agostinho Ximenes, Siguransa Alimentár Agapito Pinto, Merkadu no Turismu Gerónimo Conceição, Asaun Sosiál António Alves, Protesaun sivíl no Dezastre Naturál Clementino Barbosa no Diretora Rejistu Sivíl no Notariadu Baucau, Justina Neves.

Alende ne’e, kargu Administradór postu admistrativu nain-neen simu mos pose hanesan Admistradór postu Baguia asume hosi Mario da Silva, Baucau vila Aires Coreia , Laga lidera hosi João Castro.

Hosi Quelicai lidera hosi Paulo Moreira, Vemasse Elda de Sousa no Venilale José Boavida.

Entretantu desizaun nomeasaun PAM Baucau bazea ba depaixu númeru 05/GPM/I/2024, loron-09 janeiru kona-ba nomeasaun PAM Baucau no dekretu-lei númeru 01/2024, loron-10 janeiru kona-ba establese remunerasaun Prezidente Autoridade Munisipál nune’e eis deputada Parlamentu Nasionál (PN) Veneranda Lemos subtitui PAM sesante Olivio Bou-Lesa Freitas.

Notísia relevante: Deputada Veneranda Lemos re-eleita ba Prezidente Uniaun Inter-Parlamentár

Jonalista   : Natalino Belo 

Editór        : Evaristo Soares Martins 

iklan
iklan

Leave a Reply

iklan
error: Content is protected !!