DILI, 19 janeiru 2024 (TATOLI)–Banku Nasionál Komérsiu Timor-Leste (BNCTL) fó ona kréditu ba veteranu sira ho osan besik millaun $55 liuhosi fundu kontributivu kombatente sira-nia kada fulan $30 hatama ba banku iha konta veteranu sira-nian.
Notísia Relevante: Veteranu liu 8.000 asesu ona kréditu iha BNCTL
“Ema ne’ebé kreditu kauze rihun 8 no ema ne’e ko’a osan mak iha direitu ba kreditu no osan ne’ebé mak ema kreditu ona ne’e besik miliaun $55,” Ministru Asuntu Kombatente Libertasaun Nasionál (MACLN), Gil da Costa Monteiro “Oan Soru”, hateten ba Agência Tatoli liuhosi programa “Entrevista Eskluziva” iha estúdiu Tatoli, Faról, tersa (16 janeiru 2024) ne’e.
Kréditu hirak-ne’e, hanesan planu no polítika hosi Governu atu fundu kontributivu ne’e sirkula de’it iha rai-laran entre povu ba povu.
“Osan hamutuk millaun $39-resin ho nia lukru mak liu millaun $40. Hosi osan ne’e mak MACLN apoiu CCLN hodi kria banku kreditu ba veteranu sira,” nia dehan.
Entretantu, Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Reak Leman,”, hateten mekanizmu veteranu ida ba kréditu iha banku mak tenke halo deklarasaun iha CCLN, hafoin bele hatama dokumentu hirak ne’e ba banku.
“Atu kréditu osan ne’e ema-ne’e tenke mai CCLN hodi halo deklarasaun iha konesllu, lori konta bankaria (rekening) atuál hodi ba banku, haree osan hira mak sei iha nia konta bankaria, nune’e bele asesu ba kréditu ne’e. Maneira ko’a osan mak haree ba kuantidade osan ne’ebé mak iha ita-nia konta. Fulan-fulan manán mak $200, entaun banku ko’a $100 no $100 fámilia hodi nesesita ba nesesidade loron-loron nian. Kréditu ne’e nia másimu $5.000-$6.000,” nia hateten ba Agência Tatoli liuhosi telefónika, kinta (18 janeiru 2024) ne’e.
Kritériu atu veteranu id abele asesu kréditu iha banku mak mak ema-ne’ebé kréditu ne’e tenke iha konta BNCTL, kartaun eleitorál, fixa veteranu, maibé ba asesu kréditu iha banku seluk ne’e sei labele asesu.
Notísia Relevante: Fundu kontributivu kombatente millaun $40-resin iha konta veteranu
Jornalista : Osória Marques
Editór : Cancio Ximenes
