MSSI submete ona lista Bolsa da mãe Kondisionál 300-resin ba BNCTL
DILI, 22 janeiru 2024 (TATOLI)—Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten MSSI submete ona ona lista benefisiáriu Bolsa da Mãe Kondisionál 300-resin ba Banku Nasionál Komérsiu Timor-Leste (BNCTL, sigla portugés) hodi prosesa atu halo pagamentu.
Notísia Relevante: Governu hala’o ona pagamentu bolsa da mãe kondisionál 40.112 iha 2023
“Agora BNCTL prepara atu selu fali ema 300-resin ne’e. Lista ita manda fali ona ba BNCTL hodi prosesa fila-fali,” Diretór Jerál Ministériu Solidariedade Sosiál no Inkluzaun (MSSI) ne’e hateten ba Agência Tatoli hafoin partisipa workshop ho tema ‘Hametin Sistema Rede Referál no Jestaun Kazu Violénsia Bazea ba Jéneru” iha Hotel Timor, foin lalais ne’e.
Totál benefisiáriu iha territóriu nasionál hamutuk 41.472 ho orsamentu ne’ebé Governu prevee ne’e hamutuk $164.520, inklui mós ho benefisiáriu 300-resin ne’e.
‘Hosi totál benefisiáriu, iha konta rezeita hamutuk 52 ho nia osan $6.240, konta taka nian iha 69 ho nia osan $7.140, konta rezeitadu uza produtu poupansa ordináriu hamutuk 555 ho nia osan $62.940 no konta nulu iha 674 ho nia osan hamutuk $88.200,” nia dehan.
Konta sira-ne’ebé rejeitadu konta inkorretu, konta produtu seluk, konta taka no konta nulu ne’e sei reembolsa orsamentu, mak MSSI halo ona diskusaun entre BNCTL ho MSSI kona-ba faillansu tékniku data, ne’ebé BNCTL emprime mai ne’e nulu maibé lae.
Tanba, nia hateten. BNCTL mak la konsege update dadus ne’e entaun sira konsidera benefisiáriu 300-resin ne’e nulu maibé ida-ne’e MSSI informa ona no katak re embolsa hikas ona orsamentu refere ba konta bankária ho naran konta operasionál Programa Apoiu Kondisional Bolsa da Mãe- MSSI ho totál $164,520.00.
Notísia Relevante: Kaleidoskópiu 2023: Revoga “Bolsa da Mãe Jerasaun Foun”, mantein “Bolsa da Mãe Kondisionál”
Jornalista : Osória Marques
Editór : Cancio Ximenes
